பிற மாநில கொள்ளையா்களைப் பிடித்தது எப்படி? சைபராபாத் காவல் ஆணையா் பேட்டி

ஒசூா்: தமிழகம், தெலங்கானா இரு மாநில போலீஸாரின் கூட்டு முயற்சியால் முத்தூட் நிதிநிறுவனத்தில் தங்க நகைகளைக் கொள்ளையடித்த கும்பல் பிடிபட்டது என்று சைபராபாத் காவல் ஆணையா் வி.சி.சஜ்ஜனாா் கூறினாா்.

தெலங்கானா மாநிலம், சைபராபாத் மாநகரக் காவல் ஆணையா் வி.சி.சஜ்ஜனாா் சனிக்கிழமை செய்தியாளா்களுக்கு அளித்த பேட்டி:

தமிழ்நாடு மாநிலம், கிருஷ்ணகிரி மாவட்டம், ஒசூரில் முத்தூட் நிதி நிறுவனத்தில் ரூ. 12 கோடி மதிப்பிலான தங்க நகைகள் வெள்ளிக்கிழமை துப்பாக்கி முனையில் கொள்ளையடிக்கப்பட்டன. இதில் தொடா்புடைய கும்பல் நகைகளை எடுத்துக் கொண்டு தெலங்கானா மாநிலம் வழியாக வருவதாக கிருஷ்ணகிரி மாவட்ட காவல் துறையினா் எங்களுக்குத் தகவல் தெரிவித்தனா்.

கொள்ளையடிக்கப்பட்ட நகைகள் அனைத்தும் தனியாா் நிதி நிறுவனத்தில் பிளாஸ்டிக் கவா்களில் போடப்பட்டிருந்தன. அதில் ஜி.பி.எஸ். கருவி இருந்தது. கொள்ளையா்கள் அதை அறியாமல் அப்படியே எடுத்து வந்தனா். அதன்மூலம் கொள்ளையா்கள் வரும் பகுதி கண்டறிந்து அவா்களைப் பிடித்தோம். இந்த வழக்கில் 7 போ் கைது செய்யப்பட்டுள்ளனா். ஒருவா் தப்பிவிட்டாா். தலைமறைவான அமித், சங்கா் சிங், ரூப் சிங், சுஜித் சிங் உள்ளிட்டோா் பழைய குற்றவாளிகள். ஏற்கெனவே பஞ்சாப் மாநிலம், லூதியானாவில் இதுபோல கொள்ளை சம்பவத்தில் ஈடுபட்டுள்ளனா்.

பெங்களூரில் தங்கித் திட்டம்....

தற்போது கைதாகி உள்ள குற்றவாளிகள் அனைவரின் மீதும் பல்வேறு மாநிலங்களில் வழக்குகள் உள்ளன. இவா்களில் முதல் குற்றவாளியான ரூப் சிங், தலைமறைவாக உள்ள 2-ஆவது குற்றவாளி அமீத் ஆகியோா் பெங்களூரு வந்து ஆங்கிலம் கற்றுக் கொண்டனா். பெங்களூரில் தங்கி இருந்து எந்தப் பகுதியில் எல்லாம் கொள்ளையடிக்கலாம் என திட்டமிட்டுள்ளனா். ஒசூரில் நகைகளைக் கொள்ளையடித்து விட்டு ஜாா்கண்ட் மாநிலம் செல்ல திட்டமிட்டிருந்தனா். தமிழக காவல்துறையினா் உரிய நேரத்தில் தகவல் கொடுத்ததால் குற்றவாளிகள் அனைவரும் பிடிபட்டு, நகைகளும் மீட்கப்பட்டன என்றாா். பேட்டியின்போது கிருஷ்ணகிரி மாவட்ட காவல்துறை கண்காணிப்பாளா் பண்டி கங்காதா், உயரதிகாரிகள் உடனிருந்தனா்.

கிருஷ்ணகிரி எஸ்.பி. பேட்டி...

சைபராபாத் காவல் ஆணையா் அலுவலகத்தில் கிருஷ்ணகிரி மாவட்ட காவல் கண்காணிப்பாளா் பண்டி கங்காதா் அளித்த பேட்டி:

ஒசூரில் வெள்ளிக்கிழமை ரூ. 12 கோடி மதிப்பிலான தங்க நகைகளைக் கொள்ளையடித்த கும்பல் சனிக்கிழமை பிடிபட்டனா். தமிழகம், ஆந்திரம், கா்நாடகம், தெலங்கானா ஆகிய 4 மாநில போலீஸாரின் கூட்டு முயற்சியால் இந்த வழக்கில் குற்றவாளிகள் எளிதில் பிடிபட்டுள்ளனா். இதற்காக 4 மாநில போலீஸாருக்கும் நன்றி தெரிவித்துக் கொள்கிறேன். குற்றவாளிகளைப் பிடித்த கிருஷ்ணகிரி மாவட்ட காவல்துறையினருக்குப் பாராட்டுத் தெரிவித்த தமிழக முதல்வா் எடப்பாடி கே.பழனிசாமிக்கும் எனது நன்றியைத் தெரிவித்துக் கொள்கிறேன்.