கரோனா சிகிச்சை மையத்துக்கு கட்டில், மெத்தைகள் அனுப்பி வைப்பு
By DIN | Published On : 21st May 2021 08:21 AM | Last Updated : 21st May 2021 08:21 AM | அ+அ அ- |
ஒசூரில் இருந்து 2 லாரிகளில் அனுப்பி வைக்கப்பட்ட கட்டில், மெத்தைகள்.
கிருஷ்ணகிரி கரோனா சிகிச்சை மையத்துக்கு ஒசூா் அனைத்து ரோட்டரி சங்கம் சாா்பில் 125 கட்டில்கள், 125 மெத்தைகள், 125 தலையணைகள் ஆகியவை இரு லாரிகள் மூலம் வியாழக்கிழமை அனுப்பி வைக்கப்பட்டன.
கிருஷ்ணகிரி மாவட்டத்தில் நாள்தோறும் 600 முதல் 700 பேருக்கு புதிதாக தொற்று உறுதி செய்யப்படுகிறது. இதில் பலா் வீட்டிலேயே தனிமைப்படுத்திக்கொள்ளுமாறு மருத்துவா்கள் அறிவுரை கூறி அனுப்பி வருகின்றனா்.
கிருஷ்ணகிரி மாவட்டத்தில் உள்ள அனைத்து அரசு மருத்துவமனை, தனியாா் மருத்துவமனைகளில் படுக்கைகள் நிரம்பி விட்டன. இதனால், புதிதாக வரும் நோயாளிகளுக்கு சிகிச்சை அளிக்கும் வகையில், கிருஷ்ணகிரி மாவட்ட ஆட்சியா் டாக்டா் வி.ஜெயசந்திரபானு ரெட்டி கிருஷ்ணகிரி அரசு கலை, அறிவியல் கல்லூரியில் கரோனா சிகிச்சை மையத்தை தொடக்கி வைத்தாா்.
அதற்குத் தேவையான கட்டில்கள், மெத்தைகள், தலையணைகளை ஒசூா் அனைத்து ரோட்டரி சங்கத்தின் சாா்பில் இரண்டு லாரிகள் மூலம் அனுப்பி வைக்கப்பட்டன. இதில் ரோட்டரி சங்கத்தின் திட்டத் தலைவா் ஆா்.ஆா்.வாசுதேவன், ரோட்டரி சங்க துணை ஆளுநா் வழக்குரைஞா் ஆனந்தகுமாா், ரோட்டரி சங்கத் தலைவா்கள் பிரதீப் கிருஷ்ணன், ரவி, பன்னீா் செல்வம் உள்ளிட்டோா் கலந்துகொண்டனா்.
