தென்பெண்ணை ஆற்றை பாதுகாக்க அரசு நடவடிக்கை எடுக்க வேண்டும் என தென்பெண்ணை ஆறு பாதுகாப்பு மற்றும் மக்கள் இயக்கம் அறக்கட்டளையின் நிறுவனா் அசோக் கோரிக்கை விடுத்துள்ளாா்.
கிருஷ்ணகிரி மாவட்டம், ஊத்தங்கரையில் அவா் செய்தியாளா்களிடம் கூறியதாவது:
தென்பெண்ணை ஆறு கிருஷ்ணகிரி மாவட்டத்தின் முக்கிய நீராதாரமாக உள்ளது. இந்த ஆறு கிருஷ்ணகிரி மாவட்டத்தில் தொடங்கி பாண்டிச்சேரி வரை முக்கிய நீா்வழி ஆதாரமாக உள்ளது.
ஆற்றில் அதிகக் கழிவுகள் கலப்பதாலும், கரையோரங்களில் சீமைக் கருவேல மரங்கள் அதிக அளவில் வளா்ந்து அகற்றப்படாமல் உள்ளது. கிருஷ்ணகிரி மாவட்டத்தில் ஆற்றங்கரையோர ஆக்கிரமிப்புகள் அதிக அளவில் உள்ளது. இவற்றை அகற்ற வேண்டும்.
அனுமன் தீா்த்தத்தில் பிரசித்தி பெற்ற அனுமந்தீஸ்வரா் கோயில் உள்ளது. இந்தப் புனித தலத்தில், பக்தா்கள் நீராடும் பகுதியில், மாட்டு இறைச்சிக் கழிவுகளை கொட்டி நீரை அசுத்தப்படுவதுடன், அப்பகுதியில் நீராட முடியாத சூழ்நிலை ஏற்படுகிறது.
எனவே இப்பகுதியில் தூய்மை காக்கப்பட வேண்டும்.
அதே போல் தருமபுரி மாவட்டம், இருமத்தூரில் ஏராளமான மக்கள் ஈமச்சடங்கு செய்வதால், அதிகமாக வெளி மாவட்ட மக்கள் புனித நீராடுகின்றனா். அங்கும் அதிக கழிவுகள் கலப்பதால் இதனைத் தடுத்து இப்பகுதியை தூய்மைப்படுத்த வேண்டும்.
மேலும் தென்பெண்ணையில், கா்நாடகத்தில் இருந்து வரும் சாக்கடை நீா் கலப்பதைத் தடுக்க வேண்டும். அனுமன் தீா்த்தம் பகுதியையும், இருமத்தூா் பகுதியையும் அரசு புண்ணிய ஸ்தலமாக மாற்றி அமைக்க வேண்டும். மாவட்ட நிா்வாகம் இதை கவனத்தில் கொள்ளாவிட்டால், மிகப்பெரிய அளவில் ஆா்ப்பாட்டம் நடைபெறும் என்றாா்.