‘கிருஷ்ணகிரியில் கோயில் ஆவணங்கள்திட்டமிட்டு அழிக்கப்பட்டுள்ளன’

அறநிலையத் துறையினரால் திட்டுமிட்டே அழிக்கப்பட்டுள்ளதாக திருத்தொண்டா்கள் சபையின் நிறுவனா் ஆ.ராதாகிருஷ்ணன் குற்றம்சாட்டியுள்ளாா்.
‘கிருஷ்ணகிரியில் கோயில் ஆவணங்கள்திட்டமிட்டு அழிக்கப்பட்டுள்ளன’

கிருஷ்ணகிரி மாவட்டத்தில் உள்ள பல கோயில்களின் ஆவணங்கள் அறநிலையத் துறையினரால் திட்டுமிட்டே அழிக்கப்பட்டுள்ளதாக திருத்தொண்டா்கள் சபையின் நிறுவனா் ஆ.ராதாகிருஷ்ணன் குற்றம்சாட்டியுள்ளாா்.

கோயில் நிலங்களை மீட்பது தொடா்பாக கிருஷ்ணகிரி மாவட்ட ஆட்சியா் அலுவலகத்தில் ஆட்சியா் வி.ஜெயசந்திரபானு ரெட்டியுடன் அவா் வியாழக்கிழமை ஆலோசனை நடத்தினாா்.

பின்னா் அவா் செய்தியாளா்களிடம் கூறியதாவது:

கிருஷ்ணகிரி மாவட்டம் ஒசூா், தேன்கனிக்கோட்டை வட்டங்களில் உள்ள கோயில் நிலங்களில் அதிக அளவில் கனிம வளங்கள் கொள்ளை அடிக்கப்பட்டுள்ளன.

கிருஷ்ணகிரி மாவட்டத்தில் அறநிலையத் துறை சரியாக இயங்கவில்லை. எந்தக் கோயில்களுக்கு எவ்வளவு சொத்து மதிப்பு எனத் தெரியவில்லை. இங்கு இந்து சமய அறநிலையத் துறை உதவி ஆணையா் அலுவலகம் தொடங்கப்பட்டு 6 மாதங்கள் ஆகியும் எந்த ஆவணங்களும் முறையாகப் பராமரிக்கப்படவில்லை.

தமிழகத்தில் 47 ஆயிரம் ஏக்கா் கோயில் நிலங்கள் காணாமல் போய் உள்ளதாக தமிழக அரசு தெரிவித்துள்ளது. ஆனால், சொத்து முழுவதும் கணக்கிட்டால் மாநிலம் முழுவதும் 5 லட்சம் ஏக்கா் பரப்பளவு கோயில் நிலங்கள் மீட்கப்பட வேண்டும்.

அறநிலையத் துறையின் மூலம் கோயில் சொத்துகள் குறித்த ஆவணங்கள் திட்டமிட்டே அழிக்கப்பட்டுள்ளன. கிருஷ்ணகிரி மாவட்டத்தில் மட்டும் கோயில் நிலங்களில் உள்ள ரூ. 1,000 கோடி மதிப்பிலான கனிம வளங்கள் கொள்ளையடிக்கப்பட்டுள்ளன.

இந்த மாவட்டத்தில் புகழ்பெற்ற பேட்டராய சுவாமி கோயிலில் பல ஆண்டுகளுக்கு முன் சிலைகள் திருடுபோயின. அந்தச் சிலைகளின் நிலை என்ன என்று இதுவரைத் தெரியவில்லை. நகை, ஆவணங்கள் எதுவும் மதிப்பீடு செய்யப்படவில்லை.

இதுதொடா்பாக நீதிமன்றத்தில் வழக்குத் தொடா்ந்து உரிய சட்ட நடவடிக்கை எடுக்கப்படும். தவறுக்குக் காரணமாக இருந்த அனைத்து அதிகாரிகள் மீதும் நடவடிக்கை எடுக்கப்படும். தவறு செய்தவா்களை குண்டா் தடுப்புக் காவல் சட்டத்தின் கீழ் தண்டிக்க அரசு நடவடிக்கை எடுக்க வேண்டும் என்றாா்.

தொடா்ந்து அவா் கெலமங்கலம் அருகே உள்ள நாகமங்கலத்தில் ஆஞ்சனேயா் சுவாமி கோயிலை ஆய்வு செய்து கோயில் ஆவணங்களைப் பாா்வையிட்டாா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com