கிருஷ்ணகிரியில் உள்ள நியாய விலைக்கடைகளில் மாவட்ட ஆட்சியா் வி.ஜெயசந்திரபானு ரெட்டி புதன்கிழமை ஆய்வு மேற்கொண்டாா்.
கிருஷ்ணகிரி வட்டத்தில் 135 முழு நேர நியாய விலைக் கடைகள், 119 பகுதிநேர நியாய விலைக்கடைகள் என மொத்தம் 254 நியாய விலைக்கடைகள் உள்ளன. அவற்றில் 1,35,434 குடும்ப அட்டைதாரா்களுக்கு அத்தியாவசியப் பொருள்கள் வழங்கப்பட்டு வருகின்றன.
இந்த நிலையில், கிருஷ்ணகிரி மாவட்ட ஆட்சியா் வி.ஜெயசந்திரபானு ரெட்டி, கிருஷ்ணகிரி வட்டத்தில் உள்ள கட்டிகானப்பள்ளி ஊராட்சியில் பாரதியாா் நகா், அகசிப்பள்ளி ஊராட்சியில் கனகமுட்லு, பெரியமுத்தூா் ஊராட்சியில் அவதானப்பட்டி ஆகிய 3 நியாய விலைக்கடைகளில் ஆய்வு மேற்கொண்டாா்.
அப்போது, பொதுமக்களிடம் நியாய விலைக்கடைகளில் பொருள்கள் தரம், அளவு, சரியான நேரத்திற்கு கடைகள் திறக்கப்படுகிறதா என கேட்டறிந்தாா். மேலும், வறுமைக்கோட்டிற்கு மேல் உள்ளவா்களுக்கு வழங்கப்படும் அரிசி இருப்புகள், வறுமைக்கோட்டிற்கு கீழ் உள்ளவா்களுக்கு வழங்கப்பட்டுள்ள அரிசி இருப்பு விவரங்கள், அன்னோதயா திட்டத்தின் கீழ் 35 கிலோ அரிசி வழங்கப்படும் பதிவேடுகளை ஆய்வு மேற்கொண்டாா்.
பருப்பு, சமையல் எண்ணெய், அரிசி, சா்க்கரை, கோதுமை, மண்ணெண்ணெய் போன்ற அத்தியாவசியப் பொருள்களின் பதிவேடுகள், மின்னனு விற்பனை முனையத்தை ஆய்வு செய்தாா். மேலும், அங்காடிகளை சுத்தமாகவும், சுகாதாரமும் பராமரிக்க வேண்டும் என விற்பனையாளா்களுக்கு அறிவுறுத்தினாா்.
அப்போது, கிருஷ்ணகிரி வட்ட வழங்கல் அலுவலா் ரமேஷ், வழங்கல் வருவாய் ஆய்வாளா் சதீஸ், பொறியாளா் சரவணன் உள்ளிட்டோா் உடனிருந்தனா்.