முதலமைச்சா் கோப்பைக்கான விளையாட்டு போட்டிகளில் வெற்றி பெற்றவா்களுக்கு பரிசளிப்பு

கிருஷ்ணகிரி: கிருஷ்ணகிரி மாவட்ட அளவில் நடந்த முதலமைச்சா் கோப்பைக்கான விளையாட்டுப் போட்டிகளில் வெற்றி பெற்றவா்களுக்கு மாவட்ட ஆட்சியா் கே.எம்.சரயு பரிசுகளை வழங்கினாா்.

கிருஷ்ணகிரி மாவட்ட விளையாட்டு திடலில் தமிழ்நாடு விளையாட்டு மேம்பாட்டு ஆணையம் சாா்பாக, 2024-2025-ஆம் ஆண்டிற்கான மாவட்ட அளவிலான முதலமைச்சா் கோப்பை விளையாட்டுப் போட்டிகள் நடைபெற்றன.

இந்த போட்டிகளில் வெற்றி பெற்றவா்களுக்கு கிருஷ்ணகிரி மாவட்ட விளையாட்டு திடலில் பரிசளிப்பு விழா திங்கள்கிழமை நடைபெற்றது. நிகழ்வுக்கு மாவட்ட காவல் கண்காணிப்பாளா் தங்கதுரை, முன்னிலை வகித்தாா். மாவட்ட ஆட்சியா், தலைமை வகித்து, போட்டிகளில் வெற்றி பெற்றவா்களுக்கு பரிசுகளை வழங்கி பேசியது:

கிருஷ்ணகிரி மாவட்ட அளவில் நடைபெற்ற முதலமைச்சா் கோப்பைக்கான விளையாட்டுப் போட்டிகளில் பங்கேற்க, 21,808 போ் இணையம் வழியாக பதிவேற்றம் செய்தனா். அதில் 17,546 போ் மாவட்ட அளவிலான விளையாட்டுப் போட்டிகளில் கலந்து கொண்டனா். இதில் வெற்றிபெற்ற 687 வீரா் வீராங்கனைகளுக்கு முதல் பரிசாக ரூ. 3,000, 2-ஆம் பரிசாக ரூ. 2,000, 3-ஆம் பரிசாக ரூ. 1,000 என மொத்தம் ரூ. 44.81 லட்சம் மதிப்பில் பரிசுத்தொகை மற்றும் பதக்கங்கள் வழங்கப்பட்டன.

மாவட்ட அளவில் வெற்றி பெற்ற 687 வீரா், வீராங்கனைகள், அக். 4 முதல் 24-ஆம் தேதி வரை சென்னை, செங்கல்பட்டு, கோவை, திருச்சி மற்றும் மதுரை ஆகிய 5 மாவட்டங்களில் நடைபெறும் மாநில அளவிலான போட்டியில் பங்கேற்க உள்ளனா். மாநில அளவில் தனிநபா் போட்டிகளில் வெற்றிபெறுபவா்களுக்கு முதல் பரிசாக ரூ. 1 லட்சமும், 2- ஆம் பரிசாக ரூ. 75 ஆயிரம், 3-ஆம் பரிசாக ரூ. 50 ஆயிரமும் வழங்கப்படும்.

குழு விளையாட்டுப் போட்டிகளில் வெற்றி பெற்றவா்களுக்கு முதல் பரிசாக தலா ரூ. 75 ஆயிரம், 2-ஆம் பரிசாக ரூ. 50 ஆயிரம், 3-ஆம் பரிசாக ரூ.25 ஆயிரம் பரிசுத்தொகையாக வழங்கப்பட உள்ளது.

வெற்றி பெற்று போட்டிகளில் வழங்கப்படும் சான்றிதழ்கள் மூலம் உயா்கல்வி, வேலைவாய்ப்பில் சலுகைகள் பெற இயலும். மாவட்ட அளவில் நடைபெற்ற போட்டிகளில் வெற்றிபெற்ற வீரா் வீரங்கனைகள் மாநில அளவில் நடைபெறும் போட்டிகளில் வெற்றிபெற்று மாவட்டத்திற்கு பெருமை சோ்க்க வேண்டும் என்றாா்.

இந்நிகழ்வில், மாவட்ட ஊராட்சிக் குழுத் தலைவா் மணிமேகலை நாகராஜ், மாவட்ட விளையாட்டு மற்றும் இளைஞா் நலன் அலுவலா் ராஜகோபால், மாற்றுத் திறனாளிகள் நல அலுவலா் முருகேசன், தனி வட்டாட்சியா் ஜெய்சங்கா், கட்டிகானப்பள்ளி ஊராட்சி மன்றத் தலைவா் காயத்ரிதேவி மற்றும் பயிற்றுநா்கள், உடற்கல்வி ஆசிரியா்கள், உள்ளிட்டோா் பங்கேற்றனா்.