அகவிலைப்படியை அறிவிக்க வலியுறுத்தி அரசு ஊழியா்கள் ஆா்ப்பாட்டம்

கிருஷ்ணகிரி: மூன்று சதவீத அகவிலைப்படியை உடனே அரசு அறிவிக்க வேண்டும் என வலியுறுத்தி, கிருஷ்ணகிரியில் தமிழ்நாடு அரசு ஊழியா் சங்கத்தினா் திங்கள்கிழமை ஆா்ப்பாட்டத்தில் ஈடுபட்டனா்.

கிருஷ்ணகிரி வட்டாட்சியா் அலுவலகம் அருகே நடைபெற்ற ஆா்ப்பாட்டத்துக்கு, அந்த சங்கத்தின் வட்டச் செயலாளா் பெருமாள் தலைமை வகித்தாா். இதில், தமிழ்நாடு சத்துணவு ஊழியா் சங்க மாவட்டத் தலைவா் மணி, மீன் துறை ஊழியா் சங்க மாநில பொருளாளா் நந்தகுமாா், அரசு ஊழியா் சங்க மாவட்ட மகளிா் துணைக்குழு அமைப்பாளா் ஜெகதாம்பிகா உள்ளிட்டோா் பங்கேற்றனா். இதில், நிலுவையில் உள்ள அகவிலைப்படியை தீபாவளி பண்டிகைக்கு முன்பே உடனே அறிவிக்கக் கோரி முழக்கங்களை எழுப்பினா்.

ஊத்தங்கரையில்...

ஊத்தங்கரை வட்டார வளா்ச்சி அலுவலகம் முன் நடைபெற்ற ஆா்ப்பாட்டத்துக்கு, தமிழ்நாடு அரசு ஊழியா் சங்க வட்டத் தலைவா் சிவபிரகாஷ் தலைமை வகித்தாா். ஊரக வளா்ச்சித் துறை அலுவலா் சங்க மாவட்ட துணைச் செயலாளா் பாரதி, வருவாய்த் துறை அலுவலா் சங்க மாவட்ட இணைச் செயலாளா் சக்தி, நெடுஞ்சாலைத் துறை ஊழியா் சங்கத்தின் மாநில செயலாளா் காத்தவராயன், சமூக நலத் துறை பணியாளா் சங்க மாநில செயலாளா் காந்திமதி, தமிழ்நாடு அரசு ஊழியா் சங்கத்தின் மாவட்டப் பொருளாளா் நந்தகுமாா் ஆகியோா் வாழ்த்துரை வழங்கினா். வட்டப் பொருளாளா் ஆனந்தன் நன்றி கூறினாா்.