சுடச்சுட

    

    சங்க இலக்கியங்களின் பெருமைகளை மக்களிடம் சேர்க்க வேண்டும்

    By நாமக்கல்,  |   Published on : 12th January 2015 04:08 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    சங்க இலக்கியங்களின் பெருமைகளை மக்களிடம் சேர்க்கும் பணியை தமிழ் ஆராய்ச்சியாளர்கள் மேற்கொள்ள வேண்டும் என்று தமிழறிஞர் சிலம்பொலி செல்லப்பன் கேட்டுக்கொண்டார்.

    நாமக்கல் அண்ணா அரசு கலைக் கல்லூரியின் தமிழ்த் துறை சார்பில், செம்மொழித் தமிழாய்வு மத்திய நிறுவனத்தின் நிதி நல்கையுடன் "சமூகவியல் நோக்கில் புறநானூறு' என்ற தலைப்பில் பயிலரங்கு கடந்த 2-ஆம் தேதி தொடங்கி 10 நாள்கள் நடைபெற்றது.

    புறநானூறு குறித்து ஆய்வு மேற்கொள்ளும் தமிழ் அறிஞர்கள், பேராசிரியர்கள், மாணவர்கள் கலந்து கொண்டனர். பயிலரங்கின் நிறைவு விழா ஞாயிற்றுக்கிழமை நடைபெற்றது. கல்லூரி முதல்வர் (பொறுப்பு) ராஜாமணி தலைமை வகித்தார். தமிழ்த் துறை உதவிப் பேராசிரியர் அரசு பரமேஸ்வரன் வரவேற்றார்.

    தமிழ்த் துறைத் தலைவர் சி.பானுமதி, உதவிப் பேராசிரியர்கள் கா.சந்திரசேகரன், பி.கந்தசாமி பேசினர். 10 நாள் அமர்வுகளில் 20-க்கும் மேற்பட்ட தமிழறிஞர்கள் பங்கேற்று புறநானூறு குறித்துப் பல்வேறு தலைப்புகளில் பேசினர். இதில் 70-க்கும் மேற்பட்ட ஆராய்ச்சி மாணவர்கள் பங்கேற்றனர்.

    பயிலரங்கில் பங்கேற்றவர்களுக்கு சான்றிதழ் வழங்கி, தமிழறிஞர் சிலம்பொலி செல்லப்பன் பேசியது: தற்போது தமிழர்கள் குழந்தைகளுக்குத் தமிழ்ப் பெயர் சூட்டுவது இல்லை, குழந்தைகளைத் தமிழில் பேச அனுமதிப்பதில்லை, இதுபோன்ற செயல்களால், தமிழன் தன் அடையாளத்தை இழந்து வருகிறான்.

    இந்த நிலை மாற தமிழர்கள் சங்க இலக்கியங்களைப் படித்து, தமிழின் அருமையை உணர்ந்து, தமிழ் மொழியை வளர்க்க வேண்டும். மாணவர்கள் சங்க இலக்கியங்களைப் படிப்பதில் கவனம் செலுத்தி, தமிழக வரலாற்றையும், தமிழ் வளர்ச்சியையும் வெளிக்கொணர வேண்டும்.

    யாதும் ஊரே, யாவரும் கேளிர் என்ற புறநானூற்று வரிகள் உலகத் தமிழர்கள் அனைவரையும் சென்றடைந்துள்ளது. இந்தப் பெருமை சங்க இலக்கியத்தின் பெருமையாகக் கருதப்படுகிறது. சங்க இலக்கியங்களில் கூறப்பட்ட தமிழர் மாண்புகள் படிப்படியாகக் குறைந்து கொண்டே வருகிறது. இதனை மக்கள் மத்தியில் கொண்டு செல்ல தமிழ் இலக்கிய ஆராய்ச்சியாளர்கள் முயற்சி மேற்கொள்ள வேண்டும்.

    இதற்காக ஆராய்ச்சியாளர்கள் சங்க இலக்கிய வாழ்வியலை விளக்கும் படைப்புகளை உருவாக்க வேண்டும். இப்போது ஆங்கிலம் மற்றும் வடமொழிச் சொற்கள் பயன்பாடு அதிகமாக உள்ளது. அந்தச் சொற்களைத் தமிழ்ப்படுத்த ஆராய்ச்சியாளர்கள் முன்வர வேண்டும்.

    இப்போது அறிவியல் ஆராய்ச்சியில் கண்டுபிடிக்கப்பட்டுச் சொல்லப்படும் பெரும்பான்மையான தகவல்கள், இரண்டாயிரம் ஆண்டுகளுக்கு முன்பு எழுதப்பட்ட சங்க இலக்கியங்களில் உள்ளன.

    இத்தகைய சிறப்புகளைக் கொண்ட சங்க இலக்கியங்களின் பெருமைகளை மக்களிடம் சேர்க்கத் தவறி விட்டோம். இந்தப் பணிகளை ஆராய்ச்சியாளர்கள் மேற்கொள்ள வேண்டும். சங்க இலக்கியங்களைப் பொருள் உணர்ந்து மனப்பாடம் செய்பவர்களின் வாழ்க்கை நிச்சயம் மேம்படும் என்றார்.

    Thirumana Porutham
    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai