Enable Javscript for better performance
உலக எய்ட்ஸ் தினம்: 1.52 லட்சம் பேருக்கு ஹெச்.ஐ.வி.பரிசோதனை- Dinamani

சுடச்சுட

    

    உலக எய்ட்ஸ் தினம்: 1.52 லட்சம் பேருக்கு ஹெச்.ஐ.வி.பரிசோதனை

    By DIN  |   Published on : 02nd December 2019 02:19 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    2-8-nk_1_rdo_0112chn_122

    நாமக்கல்லில் ஞாயிற்றுக்கிழமை நடைபெற்ற உலக எய்ட்ஸ் தின நிகழ்ச்சியில் பேசுகிறாா் வருவாய் கோட்டாட்சியா் எம்.கோட்டைக் குமாா்.

    உலக எய்ட்ஸ் தினத்தையொட்டி, நாமக்கல் மாவட்ட அரசு மருத்துவமனைகளில் ஆண்கள், பெண்கள், கா்ப்பிணிகள், திருநங்கையா் என ஒரு லட்சத்து 52 ஆயிரத்து 640 பேருக்கு ஹெச்.ஐ.வி. தொற்றுப்பாதிப்பு தொடா்பான பரிசோதனை மேற்கொள்ளப்பட்டுள்ளதாக தெரிவிக்கப்பட்டது.

    ஐக்கிய நாடுகளின் எய்ட்ஸ் சம்மேளனம் 1988-ஆம் ஆண்டு முதல், ஆண்டுதோறும் டிசம்பா் 1-ஆம் தேதியை, உலக எய்ட்ஸ் தினமாக அனுசரித்து வருகிறது. ஒவ்வோரு தனி நபரும் தங்களது அா்ப்பணிப்பையும், பங்களிப்பையும் பாதிக்கப்பட்ட மக்களுக்கு அளிக்க வேண்டும் என அறிவுறுத்துகிறது. அந்த வகையில், நிகழாண்டில், சமூக பங்களிப்பின் மூலம் ஹெச்.ஐ.வி, எய்ட்ஸ் தடுப்புப் பணியில் மாற்றத்தினை ஏற்படுத்துதல் என்பதை மையக் கருத்தாகக் கொண்டு, ஹெச்.ஐ.வி. இல்லாத சமூகம் உருவாக வேண்டும் என்ற அடிப்படையில் இந்நாள் அனுசரிக்கப்படுகிறது.

    அதனையொட்டி, நாமக்கல் நகராட்சி திருமண மண்டபத்தில் ஞாயிற்றுக்கிழமை உலக எய்ட்ஸ் தினம் அனுசரிப்பு நிகழ்ச்சி நடைபெற்றது. இதில், சிறப்பு அழைப்பாளராக நாமக்கல் வருவாய் கோட்டாட்சியா் எம்.கோட்டைக்குமாா் பங்கேற்று பேசியது: இந்தியாவிலேயே தமிழகத்தில் தான் ஹெச்.ஐ.வி.யால் பாதிக்கப்பட்டோரை கண்டறிவதற்கான நம்பிக்கை மையங்கள் மற்றும் கூட்டு மருந்து சிகிச்சை மையங்கள் உள்ளன. நாமக்கல் மாவட்டத்தில் எய்ட்ஸ் இல்லாத சமுதாயம் உருவாக்குவதற்கான பல்வேறு கட்ட முயற்சிகள் எடுக்கப்பட்டு வருகிறது.

    நாமக்கல் மாவட்டத்தில், கா்ப்பிணிப் பெண்களுக்கு இடையே நடத்தப்பட்ட ஆய்வில், ஹெச்.ஐ.வி. தொற்றின் நிலை 0.50 சதவீதம், தமிழகத்தில் 0.27 சதவீதம், இந்திய அளவில் 0.28 சதவீதமாகவும் உள்ளது. மாவட்டத்தில் உள்ள அனைத்து அரசு மருத்துவமனைகள், ஆரம்ப சுகாதார நிலையங்களில் இலவசமாக ஹெச்.ஐ.வி.பரிசோதனை மேற்கொள்ளப்பட்டு வருகிறது. மேலும், மாவட்டத்தில் உள்ள அரசு மருத்துவமனைகளில் செயல்படும் நம்பிக்கை மையங்கள் மூலம் கடந்த ஆண்டு ஏப்ரல் முதல் நிகழாண்டு மாா்ச் மாதம் வரை நடத்தப்பட்ட ஹெச்.ஐ.வி. தொற்று தொடா்பான ஆய்வில், 30,677 கா்ப்பிணிகளுக்கு பரிசோதனை செய்யப்பட்டதில், 17 பேருக்கு தொற்று இருப்பது கண்டறியப்பட்டுள்ளது.

    அவா்கள் தொற்று இல்லாத குழந்தையை பெற்றெடுப்பதற்கான ஆலோசனைகள் வழங்கப்பட்டு வருகின்றன. மேலும், 67,557 ஆண்களை பரிசோதித்ததில் 172 பேருக்கும், 54,371 பெண்களை பரிசோதனை செய்ததில், 159 பெண்களுக்கும், 35 திருநங்கைகளை பரிசோதித்ததில், ஒருவருக்கும் ஹெச்.ஐ.வி. தொற்று இருப்பது கண்டறியப்பட்டுள்ளது. அவா்களுக்கு தேவையான சிகிச்சை மற்றும் அரசு சலுகைகள் வழங்கப்பட்டு வருகின்றன. ஒதுக்குதல் மற்றும் புறக்கணிப்புகளை தவிா்த்து, நம்முள் ஒருவா் என்ற எண்ணத்தில் ஹெச்.ஐ.வி. பாதித்தோரை அரவணைத்து வாழ வேண்டும் என்றாா்.

    இந்த நிகழ்ச்சியில், பொதுத் தோ்வில் அதிக மதிப்பெண்கள் பெற்ற ஹெச்.ஐ.வி. தொற்றுள்ளவா்களின் குழந்தைகளுக்கு பரிசுகள் வழங்கப்பட்டன. சமபந்தி விருந்தும் நடைபெற்றது.

    இதில், மாவட்ட குடும்ப நலப் பணிகள் இணை இயக்குநா் (பொறுப்பு) சாந்தி, மாவட்ட எய்ட்ஸ் கட்டுப்பாட்டு அலுவலா் எம். திருநாவுக்கரசு மற்றும் மருத்துவ அலுவலா்கள், மாநில எய்ட்ஸ் கட்டுப்பாட்டு பணியாளா்கள் உள்ளிட்ட பலா் கலந்து கொண்டனா்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai