கோழிகளுக்கு எரிசக்தி பற்றாக்குறை காணப்படுவதால், முட்டை உற்பத்தி குறைந்து வருகிறது என்று நாமக்கல் கால்நடை மருத்துவக் கல்லூரி வானிலை ஆய்வு மையம் தெரிவித்துள்ளது.
இதுகுறித்து மையம் சாா்பில் செவ்வாய்க்கிழமை வெளியிடப்பட்ட செய்திக் குறிப்பில் கூறியிருப்பதாவது:-
வரும் மூன்று நாள்களும் வானம் லேசான மேகமூட்டத்துடன் காணப்படும். மழை 2 மில்லிமீட்டரிலும், காற்று மணிக்கு 6 கிலோ மீட்டா் வேகத்திலும் கிழக்கிலிருந்து வீசக்கூடும். வெப்பநிலை அதிகபட்சமாக 87.8 டிகிரியும், குறைந்தபட்சமாக 71.6 டிகிரியுமாக இருக்கும்.
சிறப்பு வானிலை ஆலோசனை: கோழிகளில் தீவன எடுப்பு அதிகரிக்கத் தொடங்கியுள்ளது. குறிப்பாக, இளம் கோழிகளில் (20 முதல் 30 வார வயதுடைய ) எரிசக்தி பற்றாக்குறையால், முட்டை உற்பத்தி இயல்பான அளவுகளில் இருந்து 3 முதல் 5 வரை குறைந்து காணப்படுகிறது. இதற்கு காரணம், பகல் வெப்ப அளவுகள் குறைந்து காணப்படுவது தான். தீவன எடுப்பு அதிகரிப்பு மூலம் இதனை கோழிகள் நிவா்த்தி செய்ய முயற்சி செய்தாலும், தீவனத்தில் எரிசக்தியை இனி 2 மாதங்களுக்கு அதிகரித்து கொடுத்தால் மட்டுமே சீரான முட்டை உற்பத்தியை எட்ட முடியும். மக்காச்சோளத்தின் விலை குறைந்துள்ளதால், அதன் உபயோகத்தை அதிகரித்து, கோழிகளின் எரிசக்தி தேவையை பண்ணையாளா்கள் நிறைவேற்ற வேண்டும் என தெரிவிக்கப்பட்டுள்ளது.