கோடை மழையால் கோழிகளுக்கு தீவன எடுப்பு உயர வாய்ப்பு

கோடை மழை தொடர்வதற்கான வாய்ப்புள்ளதால்,  கோழிகளுக்கு தீவன எடுப்பு அதிகரிக்கும் என வானிலை ஆய்வு மையம் தெரிவித்துள்ளது.
இது தொடர்பாக,  நாமக்கல் கால்நடை மருத்துவக் கல்லூரி வானிலை  ஆய்வு மையம் வெளியிட்ட செய்திக் குறிப்பு: வரும் நான்கு  நாள்களுக்கு,  வானம்  லேசான மேகமூட்டத்துடன் காணப்படும். காற்று மணிக்கு நான்கு கிலோமீட்டர் வேகத்தில் தென் மேற்கில் இருந்து வீசக் கூடும். வெப்பநிலை அதிகபட்சமாக 102.2 டிகிரியும்,  குறைந்தபட்சம் 82.4 டிகிரியாக இருக்கக்கூடும்.
பண்ணையாளர்களுக்கான வானிலை ஆலோசனை: நாமக்கல்  மாவட்டத்தில்  வரும்  நாள்களில் பரவலான கோடை மழைக்கு வாய்ப்புள்ளது. பகல் மற்றும் இரவு நேர வெப்ப  மாறுபாட்டால், கோழிகளில் வெப்ப அயற்சி ஏற்பட வாய்ப்புள்ளது. தென்மேற்கு பருவக்காற்று ஆரம்பமாகி இருப்பதால், மாலையில் மேகமூட்டம் உருவாகி வெப்பத்தின் தாக்கம்  குறையும். 
காற்றின் வேகமும் சற்றுக் குறைவாகவே காணப்படும். கோடைமழை தொடரும் என்பதால், கோழிகளுக்கு  தீவன எடுப்பு உயர வாய்ப்புள்ளது. மேலும், முட்டை  எடை சம்பந்தமான குறைபாடுகள் குறைந்து காணப்படும். தொடர்ந்து கோடைக்கால தீவனப் பராமரிப்பை பண்ணையாளர்கள் தவறாமல் பின்பற்ற வேண்டும் என தெரிவிக்கப்பட்டுள்ளது.