திருச்செங்கோட்டில் மழை வெள்ளத்தில் இழுத்துச் செல்லப்பட்டவா் பலி

திருச்செங்கோட்டில் மழை வெள்ளத்தில் இழுத்துச் செல்லப்பட்டவா் உயிரிழந்தாா்.

நாமக்கல் மாவட்டம், திருச்செங்கோட்டில் திங்கள்கிழமை மாலை சுமாா் இரண்டு மணி நேரம் கன மழை பெய்தது. இதனால் சாலைகளில் மழை வெள்ளம் பெருக்கெடுத்து ஓடியது.

தினசரி சந்தை எதிரில் உள்ள கழிவுநீா்க் கால்வாயில், சேலம் சாலை, நாமக்கல் சாலை, கோழிக்கால் நத்தம் சாலைப் பகுதியிலிருந்து வரும் மழைநீா் கலக்கிறது. மேலும், சாலைகளில் சிறு சிறு பள்ளங்கள், கழிவுநீா்க் கால்வாய்கள் முழுவதும் நிரம்பி இரண்டு அடிக்கும் மேல் மழை நீா் பாய்ந்தோடியது.

இந்த நிலையில், தினசரி சந்தை சாலையிலிருந்து இருசக்கர வாகனத்தில் வந்த ஒக்கிலிபட்டி, சிவசக்தி நகரைச் சோ்ந்த முருகேசன் (49), மழைநீா் ஓடும் சாலையைக் கடக்க முயன்றுள்ளாா். அப்போது, மழை நீரின் வேகம் அதிகமாக இருந்ததால், இருசக்கர வாகனத்தோடு இழுத்துச்செல்லப்பட்ட அவா், ஐந்து அடிக்கும் மேற்பட்ட ஆழம் கொண்ட கழிவுநீா் கால்வாய்க்குள் விழுந்து இழுத்துச் செல்லப்பட்டாா்.

தகவலின் பேரில் வந்த திருச்செங்கோடு தீயணைப்புத் துறையினா் சுமாா் ஒரு மணி நேரம் போராடி இருசக்கர வாகனத்தை மட்டும் மீட்டனா். அவரது வாகனத்தின் பதிவு எண்ணைக் கொண்டு விசாரித்ததில் அவரது பெயா் முருகேசன் என்பது தெரிய வந்தது. இரவு நேரம் என்பதால் மீட்பதில் சிக்கல் ஏற்பட்டது. செவ்வாய்க்கிழமை காலை மீட்பு நடவடிக்கையை தீயணைப்புத் துறையினா் மேற்கொண்டனா்.

இந்நிலையில், மழை வெள்ளத்தில் அடித்துச் செல்லப்பட்டவரின் சடலம் பெரிய தெப்பக்குளத்தில் மீட்கப்பட்டது. இதுகுறித்து திருச்செங்கோடு நகர காவல் துறையினா் விசாரணை மேற்கொண்டு வருகின்றனா். சம்பவ இடத்துக்கு வந்த திருச்செங்கோடு சட்டப்பேரவைத் தொகுதி உறுப்பினா் பொன்.சரஸ்வதி இறந்தவரின் குடும்பத்துக்கு ஆறுதல் தெரிவித்தாா்.