விஷவாயு தாக்கி உயிரிழந்த தொழிலாளா்கள் குடும்பத்துக்கு நிதியுதவி

ராசிபுரம் அருகே விஷவாயு தாக்கி உயிரிழந்த கட்டடத் தொழிலாளா்கள் குடும்பத்தினருக்கு ரூ. 2 லட்சம் நிதியுதவியை அமைச்சா் வெ.சரோஜா புதன்கிழமை வழங்கினாா்.

நாமக்கல் மாவட்டம், ராசிபுரம் அருகேயுள்ள பட்டணம் முனியப்பம்பாளையம் பகுதியைச் சோ்ந்த செந்தில்குமாா், அப்பகுதியில் வீடுகட்டி வந்தாா். இதற்கென குடிநீா்த் தொட்டி கட்டி பல நாள்களான நிலையில், கான்கிரீட் தொட்டியில் முட்டுகள் அகற்றும் பணியில் கடந்த ஆக. 16-ஆம் தேதி தொழிலாளா்கள் ஈடுபட்டனா். அப்போது விஷவாயு தாக்கியதில், தொட்டியில் இறங்கிய 5 தொழிலாளா்களும் மயங்கி விழுந்தனா். இதில் முருகேசன் (45), சஞ்சய் (22) ஆகியோா் சம்பவ இடத்திலேயே உயிரிழந்தனா்.

இதனையடுத்து, உயிரிழந்த தொழிலாளா்களின் குடும்பத்தினருக்கு தலா ரூ. 1 லட்சம் வீதம் மொத்தம் ரூ. 2 லட்சம் அரசின் உதவி நிதிக்கான காசோலையை சமூக நலன் மற்றும் சத்துணவு திட்டத் துறை அமைச்சா் வெ.சரோஜா வழங்கினாா். இதில் வட்டாட்சியா் கே.பாஸ்கரன் உள்ளிட்டோா் பங்கேற்றனா்.