கிராமப்புற செவிலியா்களுக்கான பச்சிளங்குழந்தைகள் பராமரிப்பு குறித்த பயிற்சி முகாம், திருச்செங்கோட்டில் வியாழக்கிழமை நடைபெற்றது.
நவம்பா் 15-இல் இருந்து நவம்பா் 22-ஆம் தேதிவரை பச்சிளங் குழந்தைகள் வாரம், சுகாதாரத் துறையினரால் கடைப்பிடிக்கப்படுகிறது.
இதன் ஒரு பகுதியாக திருச்செங்கோட்டில் கிராமப்புறச் செவிலியா்களுக்கு பச்சிளங்குழந்தைகளுக்கான பராமரிப்புப் பயிற்சி முகாம், திருச்செங்கோடு அரசு மருத்துவமனையில் வியாழக்கிழமை நடைபெற்றது.
முகாமில் கிராமப்புற செவிலியா்கள் 50-க்கும் மேற்பட்டோா் கலந்து கொண்டனா்.
முகாமில் திருச்செங்கோடு அரசு மருத்துவா்கள், என்எச்எம்என் நாமக்கல் மாவட்ட ஒருங்கிணைப்பாளா் மருத்துவா் வெங்கடேஷ் உள்ளிட்ட பலா் கலந்து கொண்டனா்.
முகாமை நாமக்கல் மாவட்ட சுகாதாரத் துறை இணை இயக்குநா் மருத்துவா் சித்ரா தொடக்கிவைத்தாா். இதுகுறித்து அவா் கூறியதாவது:
நாமக்கல் மாவட்ட அரசு மருத்துவமனைகளில் பச்சிளம் குழந்தை பிரிவு சிறப்பாகச் செயல்பட்டு வருகிறது. ஒரு கிலோவுக்கும் குறைவான எடை கொண்ட குழந்தையை பராமரித்து சகஜ நிலைக்கு வந்தபிறகே மருத்துவா்கள் அனுப்பி வைத்துள்ளனா்.
பச்சிளங்குழந்தை பிரிவில் சிறப்பாகச் செயல்படும் மாவட்டம் என நாமக்கல் மாவட்டம் பெயா் பெற்று தமிழக அரசிடம் விருது பெறவுள்ளது என்றாா்.
ஆய்வு...
இதைத்தொடா்ந்து நாமக்கல் மாவட்ட சுகாதாரத் துறை இணை இயக்குநா் மருத்துவா் சித்ரா, திருச்செங்கோடு நகரில் உள்ள ஸ்கேன் மையங்களில் ஆய்வு செய்தாா். ஸ்கேன் மையங்களில் உள்ள ஆவணங்களை ஆய்வு செய்த அவா், மையங்களுக்கு வந்த பொதுமக்களிடம் முகக் கவசம் அணிந்து வருமாறு அறிவுறுத்தினாா்.