கரியபெருமாள் கோயில் நிலத்தில் குடிநீா் சுத்திகரிப்பு நிலையம்

குமாரபாளையத்தை அடுத்த பல்லக்காபாளையத்தில் கரியபெருமாள் கோயிலுக்குச் சொந்தமான நிலத்தில் குடிநீா் சுத்திகரிப்பு நிலையம் அமைக்க திருத்தொண்டா்கள் சபை எதிா்ப்புத் தெரிவித்துள்ளது.

தமிழ்நாடு குடிநீா் வடிகால் வாரியம் மூலம் திருச்செங்கோடு, பள்ளிபாளையம் ஊராட்சி ஒன்றியங்களில் உள்ள 669 குடியிருப்புகள், ஆலம்பாளையம், படைவீடு பேரூராட்சிகள், சேலம் மாவட்டம், சங்ககிரி பேரூராட்சிப் பகுதிகளுக்கு குடிநீா் வழங்கும் வகையில் ரூ. 399.46 கோடியில் கூட்டுக் குடிநீா் திட்டம் தொடங்கப்பட்டு, பணிகள் நடைபெற்று வருகின்றன.

காவிரி ஆற்றில் ராமகூடலில் நீரேற்றம் செய்யப்படும் தண்ணீா், குழாய் மூலம் கொண்டு செல்லப்பட்டு சுத்திகரித்து பின்னா் விநியோகம் செய்யப்படும்.

இத்திட்டத்தில், 25.51 எம்எல்டி தண்ணீரை சுத்திகரிக்கும் பிரதான சுத்திகரிப்பு நிலையம் குமாரபாளையத்தை அடுத்த பல்லக்காபாளையத்தில் கட்டப்பட்டு வருகிறது. இங்குள்ள கரிய காளியம்மன் கோயிலுக்குச் சொந்தமான 9.25 ஏக்கா் பரப்பளவுள்ள நிலத்தினை குடிநீா் வடிகால் வாரியம் கையகப்படுத்தி, சுத்திகரிப்பு நிலையத்துக்கான கட்டுமானப் பணிகளை மேற்கொண்டு வருகிறது.

இந்து அறநிலையத்துறைக்குச் சொந்தமான கரியபெருமாள் கோயில் நிலத்தில் கட்டுமானப் பணி மேற்கொள்ள பல்வேறு தரப்பினா் எதிா்ப்புத் தெரிவித்துள்ள நிலையில், திருத்தொண்டா்கள் சபையின் நிறுவனத் தலைவரான ஆ.ராதாகிருஷ்ணன் செவ்வாய்க்கிழமை நேரில் பாா்வையிட்டதோடு, அதிகாரிகளிடம் எதிா்ப்பினைத் தெரிவித்தாா். மேலும் அவா் கூறியதாவது:

கோயிலின் சொத்துகள் அரசுக்கோ அல்லது இந்து சமய அறநிலையத்துறைக்கு சொந்தமான சொத்துகள் அல்ல என்பதை உணரவேண்டும்.

திருக்கோயில் சொத்துகளை அரசின் உபயோகத்திற்கு சட்டத்தை வளைத்து கையகப்படுத்தக் கூடாது. தற்போதைய காலகட்டத்தில் இறைவழிபாடுகளுக்கு சொத்துகளைக் கொடுப்பவா்கள் மிகக்குறைவாக உள்ளனா். கோயில் நிலத்தை விற்பனை செய்வதால், கிடைக்கும் உயா்ந்த தொகையானது விற்பனை செய்யப்பட்ட நிலத்துக்கு ஈடாகாது. திருக்கோயில் மற்றும் கோயிலில் வீற்றிருக்கும் தெய்வங்களுக்கும் நிலங்கள் மிகவும் இன்றியமையாதது. எனவே, கோயில் நிலத்தில் குடிநீா் சுத்திகரிப்பு நிலையம் அமைக்கும் பணியைக் கைவிட வேண்டும் என்றாா்.