குமாரபாளையம் சட்டப் பேரவைத் தொகுதியில் அரசியல் கட்சிகளுக்கு இணையான பிரசாரத்தில் சுயேச்சை வேட்பாளரும், பாஜக முன்னாள் மாவட்டச் செயலாளருமான எஸ்.ஓம் சரவணா தீவிரப் பிரசாரத்தில் ஈடுபட்டாா்.
நாமக்கல் மாவட்ட பாஜக செயலாளரான எஸ்.ஓம் சரவணா, தனது கட்சிப் பொறுப்பினை ராஜிநாமா செய்துவிட்டு, தோ்தலில் குமாரபாளையம் தொகுதியில் சுயேச்சையாகப் போட்டியிடுகிறாா். ஜேகேகே நடராஜா கல்வி நிறுவனங்களின் நிா்வாக இயக்குநரான இவருக்கு, வைரம் சின்னம் ஒதுக்கப்பட்டுள்ளது. இவா், வேட்புமனுத் தாக்கல் செய்யும் முன்னரே தோ்தல் பிரசாரத்தைத் தொடங்கினாா்.
தற்போது அதிமுக, திமுக உள்ளிட்ட அரசியல் கட்சிகளுக்கு இணையாக நகர மற்றும் கிராமப்புறங்களில் தீவிரப் பிரசாரத்தில் ஈடுபட்டு வருகிறாா். குமாரபாளையத்தை அடுத்த பூலக்காடு கிராமத்தில் புதன்கிழமை தோ்தல் பிரசாரத்தில் அவா் பேசுகையில், குமாரபாளையம், திருச்செங்கோடு, எடப்பாடி மற்றும் சங்ககிரி பகுதிகளை இணைத்து குமாரபாளையத்தைத் தலைமையிடமாகக் கொண்டு தனி மாவட்டமாக மாற்ற முயற்சி எடுக்கப்படும்.
குமாரபாளையத்தில் அரசு மருத்துவக் கல்லூரி, அரசு பல்நோக்கு சிறப்பு மருத்துவமனை அமைக்கப்படும். மருத்துவம் சாா்ந்த முதலீடுகள் மற்றும் வேலைவாய்ப்பு உருவாக்கித் தரப்படும். குமாரபாளையத்தில் அனைத்து வாா்டுகளிலும் வைஃபை வசதி கொண்ட நூலகம் அமைக்கப்படும். பவானி காவிரி ஆறு தூா்வாரப்பட்டு, கழிவுகள் கலக்காத வகையில் பாதுகாக்கப்படும் என வாக்குறுதி அளித்து பிரசாரம் செய்தாா்.