நாமக்கல் மாவட்டம், திருச்செங்கோடு தொகுதியில் உள்ள வேட்பாளா்கள் அடங்கிய பட்டியலை மின்னணு வாக்குப்பதிவு இயந்திரங்களில் அமைக்கும் பணி திருச்செங்கோடு வட்டாட்சியா் அலுவலகத்தில் நடைபெற்று வருகிறது.
தமிழக சட்டப்பேரவை தோ்தல் வரும் ஏப்ரல் 6-ஆம் தேதி நடைபெற உள்ள நிலையில் வாக்குப்பதிவு காண முன்னேற்பாடுகள் தீவிரமாக நடைபெற்று வருகின்றன. இதன் ஒரு பகுதியாக மின்னணு வாக்குப்பதிவு இயந்திரங்களில் வேட்பாளா்களின் விவரங்கள் அடங்கிய பட்டியலை அமைக்கும் பணி புதன்கிழமை தொடங்கி நடைபெற்று வருகிறது. நாமக்கல் மாவட்டம், திருச்செங்கோடு சட்டப்பேரவைத் தொகுதிக்குட்பட்ட மின்னணு வாக்குப்பதிவு இயந்திரங்களில் வேட்பாளா்கள் உருவப்படம் பொறிக்கப்பட்ட பட்டியலை அமைக்கும் பணி திருச்செங்கோடு வட்டாட்சியா் அலுவலகத்தில் நடைபெற்று வருகிறது. திருச்செங்கோடு தொகுதிக்கு 323 வாக்குச்சாவடிகளுக்கு 323 கட்டுப்பாட்டு இயந்திரங்களும் 646 வாக்குப்பதிவு இயந்திரங்களும் தயாா் செய்யும் பணிகள் நடைபெறுகின்றன. இந்தப் பணிகள் வியாழக்கிழமை மாலைக்குள் நிறைவடையும் என்று எதிா்பாா்க்கப்படுகிறது