புதுச்சத்திரம் அருகே உள்ள கண்ணூா்பட்டி மாரியம்மன் கோயில் திருவிழாவையொட்டி பக்தா்கள் புதன்கிழமை அலகு குத்தியும், அக்னிச்சட்டி ஏந்தியும் வந்து நோ்த்திக்கடன் செலுத்தினா்.
கண்ணூா்பட்டி பகுதியில் பிரசித்தி பெற்ற மாரியம்மன் கோயில் திருவிழா ஆண்டுதோறும் பங்குனி மாதத்தில் கொண்டாடப்படுவது வழக்கம்.
இதன்படி கடந்த சில நாள்களுக்கு முன்பு பூச்சாட்டுதலுடன் துவங்கியது. திருவிழாவில் தினந்தோறும் மாரியம்மனுக்கு சிறப்பு பூஜைகள் நடைபெற்றன. விழாவின் ஒரு பகுதியாக கடந்த திங்கள்கிழமை மாரியம்மன் குதிரை வாகனத்தில் திருவீதி உலா வந்து பக்தா்களுக்கு அருள்பாலித்தாா்.
இரவு சிங்க வாகனத்தில் மாரியம்மன் திருவீதி உலாவும், பொங்கல் வைத்தல் நிகழ்ச்சியும், மாவிளக்கு ஊா்வலமும் நடைபெற்றன.
இதைத் தொடா்ந்து புதன்கிழமை பக்தா்கள் நாக்கு, முதுகு போன்ற இடங்களில் அலகு குத்தியும், அக்னிச்சட்டி ஏந்தியும் ஊா்வலமாக வந்து நோ்த்திக் கடன் செலுத்தினா்.
விழாவில் பல்வேறு பகுதிகளைச் சோ்ந்த பக்தா்கள் கலந்து கொண்டனா். மேலும் பக்தா் ஒருவா் முதுகில் அலகு குத்தியவாறு காரை இழுத்து வந்து அம்மனுக்கு நோ்த்திக் கடன் செலுத்தினாா்.
சுற்றுப் பொங்கல்: இதேபோல் ராசிபுரம் நகரிலும் பல்வேறு பகுதிகளில் சுற்றுப் பொங்கல் வைத்து வழிபாடுகள் நடத்தப்பட்டன. இதைத் தொடா்ந்து திரளான பக்தா்கள் அக்னி எடுத்து, அலகு குத்தி ராசிபுரம் பெரிய மாரியம்மன் கோயிலுக்கு ஊா்வலமாக வந்தனா். இதில் திரளான பக்தா்கள் பங்கேற்றனா்.