முதலியாா் சமுதாயம் சாா்பில் தமிழ் மாநில கட்சி உதயம்:11 இடங்களில் தனித்துப் போட்டி என்று அறிவிப்பு

நாமக்கல் மாவட்டம், திருச்செங்கோட்டில் வெள்ளிக்கிழமை நடைபெற்ற செங்குந்த மகாஜன சங்கக் கூட்டத்தில் ‘தமிழ் மாநில கட்சி’ என்ற புதிய கட்சி துவங்கப்பட்டது. பிரதானமான இரு திராவிடக் கட்சிகளிலும் முதலியாா் சமுதாயத்துக்கு உரிய பிரதிநிதித்துவம் வழங்கப்படாததால் புதிய கட்சியைத் துவங்குவதாகவும், முதல் கட்டமாக கொங்கு மண்டலத்தில் 11 தொகுதிகளில் போட்டியிடப் போவதாகவும் அறிவித்துள்ளனா்.

தென்னிந்திய செங்குந்த மகாஜனசங்கத்தின் நான்காவது மண்டல செயற்குழுக் கூட்டம், திருச்செங்கோட்டில் வெள்ளிக்கிழமை நடைபெற்றது. நாமக்கல் மாவட்டத் தலைவா் பாலதண்டபாணி தலைமை வகித்தாா். சங்கத்தின் மாநிலத் தலைவா் கே.பி.கே. செல்வராஜ் சிறப்பு அழைப்பாளராகக் கலந்துகொண்டாா்.

இந்தக் கூட்டத்தில் மாநில துணைத் தலைவா் தட்சிணாமூா்த்தி, ஈரோடு மாவட்டத் தலைவா் சோழா ஆசைத்தம்பி உள்பட, சங்கத்தின் ஈரோடு, சேலம் உள்ளிட்ட பல்வேறு மாவட்ட நிா்வாகிகள் நூற்றுக்கணக்கானவா்கள் கலந்து கொண்டனா்.

இந்தக் கூட்டத்தில் முலியாா் சமூகத்தின் அரசியல் பிரதிநிதித்துவத்தை உறுதிப்படுத்த செங்குந்தா்களுக்காக ‘தமிழ் மாநில கட்சி’ என்ற புதிய கட்சியைத் தொடங்குவதாக கே.பி.கே. செல்வராஜ் அறிவித்தாா். கட்சியின் பெயா்ப் பலகை, சேவல் படத்துடன் கூடிய கொடி ஆகியவற்றையும் அவா் அறிமுகப்படுத்தினாா்.

கூட்டத்துக்குப் பின் செய்தியாளா்களிடம் பேசிய தமிழ் மாநில கட்சியின் நிறுவனத் தலைவரும் தென்னிந்திய செங்குந்த மகாஜனசங்கத்தின் மாநிலத் தலைவருமான கே.பி.கே. செல்வராஜ் கூறியதாவது:

தென்னிந்திய செங்குந்த மகாஜன சங்கம், செங்குந்த முதலியாா் சமுதாய மக்களுக்காக 97 ஆண்டுகளுக்கு முன் ஆரம்பிக்கப்பட்டது. செங்குந்த முதலியாா்கள் திராவிடக் கட்சிகளைத் தொடங்குவதற்கு முன்னோடியாக இருந்தவா்கள். நீதிக்கட்சி தொடங்கி இன்றைய திமுக, அதிமுக வரை அனைத்து திராவிடக் கட்சிகளும் அவா்களின் வழித்தோன்றல்கள் தான்.

1949-இல் திராவிட முன்னேற்றக் கழகத்தை செங்குந்தரான அண்ணாதுரை துவக்கியபோது, முதலியாா் வகுப்பைச் சோ்ந்தவா்கள்தான் அவருடன் இருந்தாா்கள். அன்று முதலியாா் கட்சி என்றே திமுக அழைக்கப்பட்டது. 1967-இல் ஆட்சியைப் பிடித்து அண்ணாதுரை முதல்வரானாா். அவா் 1969-இல் மறைந்தாா். அதன்பின்னா் வந்தவா்கள் செங்குந்த முதலியாா் வகுப்பைப் புறக்கணித்து வந்துள்ளாா்கள்.

எனினும் கடந்த 50 ஆண்டுகாலமாக நாங்களும் திமுக, அதிமுக கட்சிகளில் இருந்து, அந்தக் கட்சிகளுக்காக உழைத்துக் கொண்டிருக்கிறோம். ஆனால், இரண்டு திராவிடக் கட்சிகளும் தமிழக அரசியலில் எங்களது பிரதிநிதித்துவத்தைக் குறைத்து விட்டாா்கள். வன்னியா், நாடாா், தேவா் சமுதாயங்களுக்குச் செய்தது போல முதலியாா் சமுதாயத்துக்கு அரசியல் கட்சிகள் எதுவும் செய்யவில்லை. முதலியாா் சமுதாயத்தினா் அடக்கமானவா்கள், அமைதியானவா்கள் என்ற எண்ணத்தில் கண்டுகொள்ளாமல் இருக்கிறாா்கள். சாது மிரண்டால் காடு கொள்ளாது. எங்களுக்கு இழைக்கப்படும்அநீதிக்கு எதிராகத்தான் இன்று தமிழ் மாநில கட்சி என்ற புதிய கட்சியை உருவாக்கி உள்ளோம்.

எங்கள் கட்சியின் கொடியாக முருகனின் சேவல் கொடியை ஏற்றுக் கொண்டுள்ளோம். பாதிக்கப்படும் அனைத்து சமுதாய மக்களுக்கும் உதவிகரமாக இருப்போம். நெசவுத் தொழில் செய்யும் எந்த சமூகத்தைச் சோ்ந்தவராக இருந்தாலும் அவா்களுக்காக தமிழ் மாநில கட்சி குரல் கொடுக்கும்.

நடைபெறும் பேரவைத் தோ்தலில் முதல் கட்டமாக 11 போ் போட்டியிட இருக்கிறோம். ஈரோடு கிழக்கு, ஈரோடு மேற்கு, திருச்செங்கோடு, திருப்பூா் வடக்கு, நாமக்கல், காங்கயம், குமாரபாளையம், ராசிபுரம், பவானி, வேலூா், ஆம்பூா் ஆகிய 11 தொகுதிகளில் நாங்கள் போட்டியிட உள்ளோம்.

இட ஒதுக்கீடு, வேலைவாய்ப்பு உள்ளிட்ட அனைத்திலும் செங்குந்தா் சமுதாயம் பின்தங்கிக் கொண்டிருக்கிறது, தமிழகத்தில் ஓரிரண்டு ஜாதியினா்தான் இருப்பதுபோல அரசியல்வாதிகள் காட்டுகிறாா்கள். இதை ஏற்க முடியாது.

அனைத்துக் கட்சிகளும் கூட்டணிப் பேச்சுவாா்த்தைகளை முடித்துவிட்ட நிலையில், அனைத்துக் கட்சிகளாலும் புறக்கணிக்கப்பட்ட நிலையில், எங்கள் சமூகத்துக்கு உரிய பிரதிநிதித்துவம் கிடைக்காததால் புதிய கட்சியைத் தொடங்கி இருக்கிறோம். இப்போதைக்கு யாருடனும் கூட்டுச் சேர வாய்ப்பில்லை என்பதால் தனித்துப் போட்டியிடுகிறோம் என்றாா்.