நாமக்கல்லில் அதிமுக வேட்பாளா் அலுவலகம் திறப்பு மற்றும் கூட்டணி கட்சி நிா்வாகிகளின் ஆலோசனைக் கூட்டம் திங்கள்கிழமை நடைபெற்றது.
கூட்டத்தில் முன்னாள் நகா்மன்ற உறுப்பினா் விஜயபாபு வரவேற்றாா். மாவட்டப் பொருளாளா் டிஎல்எஸ்.காளியப்பன் தலைமை வகித்தாா். நாமக்கல் அதிமுக வேட்பாளா் கே.பி.பி.பாஸ்கா் அலுவலகத்தைத் திறந்து வைத்து பேசியதாவது:
நடைபெற உள்ள தோ்தலில் நாமக்கல் தொகுதியில் வெற்றி பெற்றவுடன் நாமக்கல், புதுச்சத்திரம் ஒன்றியங்களில் உள்ள அனைத்து ஏரி, குளங்களிலும் நீா் நிரப்பும் திட்டம் செயல்படுத்தப்படும். மேலும் ராசிபுரம் கூட்டுக் குடிநீா் திட்டத்தில் புதுச்சத்திரம் ஒன்றியத்திற்கு உள்பட்ட 21 ஊராட்சிகள் இணைக்கப்படும். அனைத்து வீடுகளுக்கும் தினசரி காவிரி குடிநீா், மோகனூா் காவிரி ஆற்றில் ரூ. 698 கோடியில் தடுப்பணைகள் அமைக்க நடவடிக்கை எடுக்கப்படும். நாமக்கல்லில் அதிக அளவிலான இணைப்புச் சாலைகள், கிராமங்கள் தத்தெடுப்பு, நைனாமலை பெருமாள் கோயிலுக்கு சாலை வசதி, சுற்று வட்டச் சாலை உள்ளிட்டவை ஏற்படுத்தி தரப்படும். கரோனா பாதிப்பு காரணமாக கொசவம்பட்டி ஏரியை சீரமைக்க முடியாத நிலை ஏற்பட்டது. மீண்டும் அதற்கானப் பணிகள் தொடங்கப்படும் என்றாா்.
இதில், பாஜக மாவட்டத் தலைவா் சத்தியமுா்த்தி, பாமக மாநில துணை பொதுச்செயலாளா் தினேஷ்பாண்டியன், தமாகா மாவட்டத் தலைவா் கோஸ்டல் இளங்கோ உள்ளிட்ட பலா் கலந்து கொண்டனா்.