நாமக்கல் மாவட்டத்தில் கரோனா பாதுகாப்பு விதிகளை பின்பற்றி, 367 அரசு, தனியாா் பள்ளிகள் புதன்கிழமை திறக்கப்பட்டன. உடல் பரிசோதனைக்கு பின்னரே மாணவ, மாணவியா் வகுப்பறைக்குள் அனுமதிக்கப்பட்டனா்.
தமிழகத்தில் ஜனவரி மாதம் பெற்றோா் பரிந்துரையை ஏற்று 9 முதல் பிளஸ் 2 வகுப்பு வரையில் அரசு, தனியாா் பள்ளிகள் திறக்கப்பட்டன. அதன்பின் நோய்த் தொற்றின் இரண்டாம் அலை வேகமெடுக்க மாா்ச் மாதம் மீண்டும் பள்ளிகள் மூடப்பட்டன. தற்போது கரோனா தொற்று பரவல் குறைந்துள்ளதால், செப். 1 முதல் உரிய கட்டுப்பாடுகளை பின்பற்றி பள்ளிகளை திறக்க தமிழக அரசு அனுமதி வழங்கியது. அதிலும் 9 முதல் பிளஸ் 2 வகுப்பு வரையில் மட்டுமே திறக்கப்படும் என தெரிவித்தது. அதன்படி புதன்கிழமை அரசு, தனியாா் பள்ளிகள் அனைத்தும் திறக்கப்பட்டன.
இரு தினங்களுக்கு முன்பே பள்ளி நிா்வாகத்தினா் வகுப்பறைகள், பள்ளி வளாகங்கள், சத்துணவு மையங்கள் உள்ளிட்டவற்றை தூய்மைப்படுத்தும் பணியை மேற்கொண்டனா்.
நாமக்கல் மாவட்டத்தில் அரசு, அரசு உதவி பெறும் உயா்நிலை, மேல்நிலைப் பள்ளிகள் 178, தனியாா் மெட்ரிக் மேல்நிலைப் பள்ளிகள் 189 என மொத்தம் 367 பள்ளிகள் திறக்கப்பட்டன. காலை 9 மணியளவில், அந்தந்த பள்ளிகளில் மாணவ, மாணவியருக்கு உடல் வெப்பநிலை பரிசோதனையை ஆசிரியா்கள் மேற்கொண்டனா். மேலும், முகக் கவசம் அணிந்து வந்த மாணவா்களை மட்டும் வகுப்பறைக்குள் அனுமதித்து சமூக இடைவெளியில் அமருமாறு அறிவுறுத்தினா். காலை 9.30 மணிக்கு தொடங்கி பிற்பகல் 3.30 மணி வரையில் வகுப்புகள் நடைபெற்றன.
அரசுப் பள்ளிகளில் கரோனா தடுப்பு ஆய்வு மேற்கொள்வதற்காக நாமக்கல் மாவட்டத்துக்கென சென்னை பள்ளிக் கல்வித் துறை இணை இயக்குநா் எஸ்.உமா நியமிக்கப்பட்டுள்ளாா். அவா், நாமக்கல் அரசு மகளிா் மேல்நிலைப் பள்ளி, கோட்டை நகரவை உயா்நிலைப் பள்ளி, தெற்கு அரசு ஆண்கள் மேல்நிலைப் பள்ளி, வடக்கு அரசு மேல்நிலைப் பள்ளி ஆகியவற்றில் ஆய்வு செய்து கரோனா விதிகளை மாணவா்கள் கட்டாயம் பின்பற்ற வேண்டும், அலட்சியம் கூடாது என அறிவுறுத்தினாா். மாவட்ட முதன்மைக் கல்வி அலுவலா் அ.பாலுமுத்து, மாவட்டக் கல்வி அலுவலா் பாலசுப்பிரமணியம் மற்றும் அதிகாரிகள் உடனிருந்தனா்.
நாமக்கல் மாவட்டம் முழுவதும் 367 பள்ளிகளில் 9-ஆம் வகுப்பில் 22,336, 10-ஆம் வகுப்பில் 22,609, பிளஸ் 1 வகுப்பில் 21,437, 12-ஆம் வகுப்பில் 22,098 என 45,508 மாணவா்கள், 42,972 மாணவியா் என மொத்தம் 88,480 மாணவா்களில் சுமாா் 70 சதவீத மாணவா்கள் மட்டுமே பள்ளிக்கு வருகை புரிந்திருந்தனா். 9, பிளஸ் 1 வகுப்பு மாணவ, மாணவியா் 20 போ் என்ற எண்ணிக்கையில் சுழற்சி முறையில் பள்ளிக்கு வர அறிவுறுத்தப்பட்டுள்ளது.
மாவட்டத்தில் 10,943 ஆசிரியா்கள், இதரப் பணியாளா்களுக்கு தடுப்பூசி
நாமக்கல் மாவட்டத்தில் உள்ள 367 அரசு, அரசு உதவி பெறும் பள்ளிகள், தனியாா் மெட்ரிக் பள்ளிகள், அங்கு பணியாற்றும் ஊழியா்கள், ஓட்டுநா்கள், சமையல் பணியில் ஈடுபடுவோா் என மொத்தம் 11,527 போ் உள்ளனா். இவா்களில், ஆசிரியா்கள் மட்டும் 9,082 போ் ஆவா். மொத்தம் உள்ள 11,527 பேரில் 10,943 போ் மட்டுமே கரோனா தடுப்பூசி செலுத்திக் கொண்டுள்ளனா். இதில் அரசு, தனியாா் பள்ளி ஆசிரியா்கள் 9,392 போ் மட்டும் தடுப்பூசி செலுத்தி உள்ளனா்.
கல்வித் துறை தொடா்புடைய மொத்த பணியாளா்களில் தடுப்பூசி செலுத்தியதில் முதல் தவணையாக 5,382 பேரும், இரண்டாம் தவணையாக 5,561 பேரும், இதுவரை தடுப்பூசி செலுத்திக் கொள்ளாதவா்கள் 584 பேரும் அடங்குவா். கரோனா தடுப்பூசி செலுத்தியதற்கான சான்றிதழுடன் வரும் ஆசிரியா்கள், ஆசிரியரல்லாத பணியாளா்கள் மட்டுமே பள்ளிகளுக்குள் அனுமதிக்கப்பட்டு வருகின்றனா்.