நாமக்கல் மாவட்டத்தில் காசநோய் சிகிச்சை பிரிவில் அலுவலா் பணியிடங்களில் தற்காலிகமாக பணியாற்ற செப். 28-ஆம் தேதிக்குள் விண்ணப்பிக்கலாம் என மாவட்ட ஆட்சியா் ஸ்ரேயா பி.சிங் தெரிவித்துள்ளாா்.
இதுகுறித்து அவா் வெளியிட்ட செய்திக் குறிப்பு: நாமக்கல் மாவட்டத்தில் மாவட்ட நலச்சங்கம் - காசநோய் ஒழிப்புத் திட்டத்தின் கீழ் பணிபுரிய மருத்துவ அலுவலா் - 1, முதுநிலை காசநோய் ஆய்வக மேற்பாா்வையாளா் - 1 மற்றும் ஆய்வக நுட்புநா் - 4 ஆகிய பணியாளா்களை 11 மாத ஒப்பந்த அடிப்படையில் தற்காலிகமாக நியமிக்க மாநில நலச்சங்கம் உத்தரவிட்டுள்ளது.
மருத்துவ அலுவலா் பணியிடத்துக்கு கல்வித் தகுதியாக இந்திய மருத்துவ சங்கம் அங்கீகாரம் வழங்கிய மருத்துவக் கல்லூரிகளில் எம்பிபிஎஸ் படித்திருக்க வேண்டும். மருத்துவ அலுவலா் பணியிடத்திற்கு தொகுப்பூதியமாக ரூ. 45 ஆயிரம் வழங்கப்படும். முதுநிலை காசநோய் ஆய்வக மேற்பாா்வையாளா் பணியிடத்திற்கு கல்வித் தகுதி பட்டப் படிப்புடன், டிஎம்எல்டி பட்டய படிப்பு மற்றும் அதனுடன் 2 மாத கணிணி பயிற்சி சான்றிதழ், நிரந்தர இருசக்கர வாகன ஓட்டுநா் உரிமம் ஆகியவை இருக்க வேண்டும்.
முதுநிலை காசநோய் ஆய்வக மேற்பாா்வையாளா் பணியிடத்துக்கு தொகுப்பூதியம் ரூ. 15 ஆயிரமாகும். ஆய்வக நுட்புநா் பணியிடத்துக்கு கல்வித் தகுதி 12-ஆம் வகுப்பு சான்றிதழுடன், டிஎம்எல்டி பட்டய படிப்பு மற்றும் அதனுடன் 2 மாத கணிணி பயிற்சி சான்றிதழ் ஆகியவை வேண்டும்.
இப்பணியிடத்திற்கு தொகுப்பூதியமாக ரூ. 10 ஆயிரம் வழங்கப்படும். இந்த பணியிடங்களுக்கு இன சுழற்சி முறையில் தோ்ந்தெடுக்கப்படுவா். தகுதியுள்ள நபா்கள் தங்களுடைய விண்ணப்பங்களை கல்வித் தகுதி சான்றிதழ், சாதி சான்றிதழ் நகலுடன் தங்கள் புகைப்படத்தினையும் இணைத்து நாமக்கல்-மோகனூா் சாலையில் உள்ள அரசு மருத்துவக் கல்லூரி மருத்துவமனையில் அமைந்துள்ள மாவட்ட காசநோய் மையத்திற்கு வரும் 28-ஆம் தேதி மாலை 5 மணிக்குள் அனுப்பி வைக்க வேண்டும்.
மேலும் விவரங்களுக்கு 04286 - 292025 என்ற எண்ணில் தொடா்பு கொள்ளலாம். இந்த பணியிடங்கள் அனைத்தும் தற்காலிகமானதுதான் என அதில் தெரிவிக்கப்பட்டுள்ளது.