நாமக்கல்லுக்கான ரயில் வசதிகளை நிறைவேற்ற மத்திய அமைச்சா், 2 எம்.பி.களுக்கு கோரிக்கை

நாமக்கல்லுக்குத் தேவையான ரயில் வசதிகளை ஏற்படுத்திக் கொடுக்க, மத்திய இணை அமைச்சா் எல்.முருகன், மக்களவைத் தொகுதி உறுப்பினா் ஏ.கே.பி.சின்ராஜ், மாநிலங்களவை உறுப்பினா் கே.ஆா்.என்.ராஜேஷ்குமாா் ஆகியோா் ரயில்வே அமைச்சகத்தை வலியுறுத்த வேண்டும் என கோரிக்கை விடுக்கப்பட்டுள்ளது.

இது தொடா்பாக மாவட்ட பொது நல அமைப்புகள், தொழில் சாா்ந்த சங்கங்கள், பொதுமக்கள் சாா்பில் வெளியிட்ட அறிக்கை:

இதுவரை இல்லாத வகையில், நாமக்கல் மாவட்டத்தைச் சோ்ந்த ஒருவா் மத்திய இணை அமைச்சராகவும், மக்களவை உறுப்பினா், மாநிலங்களவை உறுப்பினா் என இருவா் உள்ளனா். மத்திய அரசிடம் நெருக்கத்துடன் உள்ள இவா்கள் நாமக்கல் மாவட்டத்துக்கான தேவைகளை நிறைவேற்றிக் கொடுக்க வேண்டும்.

குறிப்பாக இந்த மாவட்டத்துக்கான ரயில் தேவைகள் இன்னும் சரிசெய்யப்படாமலே உள்ளன. இதனால் பல்வேறு அமைப்புகளைச் சோ்ந்தோரும், தொழில் சங்கத்தினரும் பொதுமக்களும் சேலம், கரூா் ரயில் நிலையங்களை நோக்கி பயணிக்க வேண்டிய இக்கட்டான சூழல் உள்ளது.

வாரத்தில் மூன்று நாள்கள் இயங்கும் சென்னை சென்ட்ரல்- மதுரை ரயில் நாமக்கல் ரயில் நிலையத்தில் நின்று செல்ல வேண்டும். வாராந்திர ரயிலான நான்கு நாள்கள் மட்டும் இயக்கப்படும் மும்பை - நாகா்கோயில் ரயிலும் நின்று செல்ல வேண்டும்.

சென்னை - பாலக்காடு அதிவேக விரைவு ரயில் ராசிபுரத்தில் நிற்க வேண்டும். பெங்களூரு - நாகா்கோவில் தினசரி ரயில் மோகனூா் ரயில் நிலையத்தில் நின்று செல்ல வேண்டும். அரக்கோணம் - சேலம் ரயிலை நாமக்கல் வழியே கரூா் வரை நீட்டிப்பு செய்ய வேண்டும்.

சென்னை எழும்பூா் - சேலம் தினசரி ரயிலை நாமக்கல் வழியாக கரூா் வரை நீட்டிப்பு செய்து இயக்க வேண்டும். ஈரோடு வழியாகச் சுற்றி செல்லும் ரயில்கள் சிலவற்றை நாமக்கல் வழியே இயக்க வேண்டும். நாமக்கல் - அரியலூா் புதிய ரயில் பாதை திட்டத்தை விரைந்து நிறைவேற்ற வேண்டும்.

நாமக்கல் ரயில் நிலையத்தில் இரு நடைமேடைகளுக்கு இடையே பயணிகள் செல்லும் வகையில் நடைமேம்பாலம் அமைக்கப்பட வேண்டும்.

நாமக்கல், ராசிபுரம், மோகனூா் மற்றும் சங்ககிரி ரயில் நிலையங்களில் உணவக வசதி செய்து தர வேண்டும். நாமக்கல் ரயில் நிலையத்தில் வங்கி ஏடிஎம் வசதி செய்து தரப்பட வேண்டும். மக்கள் அதிகம் பயணிக்கும் வகையில் திருச்சி - பெங்களூரு இடையே புதிய விரைவு ரயில் இயக்கப்பட வேண்டும்.

2022-ஆம் ஆண்டில் இதற்கான பணிகள் தொடங்க வேண்டும் என எதிா்பாா்க்கிறோம். மத்திய இணை அமைச்சா் எல்.முருகன் மற்றும் நாடாளுமன்ற உறுப்பினா்கள் ஏ.கே.பி.சின்ராஜ், கே.ஆா்.என்.ராஜேஷ்குமாா் ஆகியோா் அதற்கான முயற்சிகளை மேற்கொள்ள வேண்டும் என அதில் தெரிவிக்கப்பட்டுள்ளது.