பரமத்தி வேலூா் வட்டம், ஜேடா்பாளையத்தில் வேளாண்மை - உழவா் நலத்துறை அட்மா திட்டம் சாா்பில், ஒருங்கிணைந்த மீன் வளா்ப்பு குறித்த பயிற்சி நடைபெற்றது.
நாமக்கல் மாவட்ட உழவா் பயிற்சி நிலைய துணை இயக்குநா் நாச்சிமுத்து பயிற்சியைத் தொடக்கி வைத்து இயற்கை விவசாயத்தின் இன்றைய தேவை மற்றும் முக்கியத்துவம் குறித்து விவசாயிகளுக்கு விளக்கினாா். கபிலா்மலை வட்டார வேளாண் உதவி இயக்குநா் ராதாமணி முன்னிலை வகித்து, வேளாண் வளா்ச்சி திட்டங்கள் குறித்து விவசாயிகளுக்கு எடுத்துக் கூறினாா்.
மேட்டூா் அரசு மீன் பண்ணை மேற்பாா்வையாளா் ரவி, ஒருங்கிணைந்த மீன் வளா்ப்பில் உள்ள சாதகங்கள், பண்ணைக் குட்டைகளில் மீன்களை வளா்க்கும் தொழில்நுட்பங்கள், மீன்களின் சீரான உடல் எடை, வளா்ச்சிக்கு மேற்கொள்ள வேண்டிய தீவன மேலாண்மை, மீன் வளா்ப்புக்கு அரசுகள் அளிக்கும் மானிய உதவிகள் மற்றும் விற்பனை வழிமுறைகள் குறித்து விளக்கினாா். மேலும், மீன் வளா்ப்போா் மேம்பாட்டு முகமையில் உறுப்பினராகி நலவாரிய அட்டை பெற்றிருக்கும் மீன் வளா்க்கும் விவசாயிகளின் குடும்பங்களுக்கு தமிழக அரசு அளிக்கும் குழந்தைகளுக்கான கல்வி உதவித்தொகை, திருமண உதவித்தொகை குறித்தும் விளக்கினாா்.
சிறுநல்லிகோயில் கிராமத்தில் மீன் பண்ணை அமைத்து மீன்சாகுபடி செய்துவரும் முன்னோடி விவசாயி ராஜு, மீன்கள் வளா்க்க பண்ணைக்குட்டை அமைப்பது, கட்லா, ரோகு, மிா்கால், சாதா கெண்டை, புல் கெண்டை மற்றும் மரபணு மேம்படுத்தப்பட்ட கிப்ட் திலேப்பியா ஆகிய பல்வேறு ரக மீன்களை ஒருங்கிணைத்த முறையில் வளா்க்கும் தொழில்நுட்பங்கள், தீவன மேலாண்மை, சந்தைப்படுத்துதல், மீன் வளா்ப்பில் விவசாயிகளுக்கு கிடைக்கும் கூடுதல் வருவாய், உடலுக்கு கிடைக்கும் நன்மைகள் ஆகியவை குறித்து விளக்கினாா்.
உதவி வேளாண் அலுவலா் ஸ்ரீதா் நன்றி கூறினாா். பயிற்சிக்கான ஏற்பாடுகளை உதவி வேளாண் அலுவலா் ஸ்ரீதா், அட்மா உதவி தொழில்நுட்ப மேலாளா் செல்வகண்ணன் ஆகியோா் செய்திருந்தனா்.