நாமக்கல் அருகே ரூ. 50 லட்சம் கேட்டு சிறுமியை கடத்திய தம்பதி கைது

 நாமக்கல் அருகே ரூ. 50 லட்சம் கேட்டு சிறுமியைக் கடத்திய வழக்கில் தம்பதி திங்கள்கிழமை அதிகாலை கைது செய்யப்பட்டனா்.

 நாமக்கல் அருகே ரூ. 50 லட்சம் கேட்டு சிறுமியைக் கடத்திய வழக்கில் தம்பதி திங்கள்கிழமை அதிகாலை கைது செய்யப்பட்டனா்.

நாமக்கல் மாவட்டம், எருமப்பட்டி ஒன்றியம், காளிச்செட்டிப்பட்டியைச் சோ்ந்தவா் லாரி ஓட்டுநா் சரவணன் (36). இவரது மனைவி கெளசல்யா (29). இவா்களுக்கு 13 வயதுடைய மகனும், 11 வயதுடைய மகளும் உள்ளனா். சனிக்கிழமை இரவு வீட்டின் மாடியில் கெளசல்யா தனது மகன், மகளுடன் உறங்கிக் கொண்டிருந்தாா். நள்ளிரவு 2 மணியளவில் முகமூடி அணிந்து வந்த இருவா் கத்தியைக் காட்டி மிரட்டி சிறுமியை மட்டும் கடத்திச் சென்றனா். இது தொடா்பாக எருமப்பட்டி போலீஸாா் வழக்குப்பதிவு செய்து சிறுமியை தீவிரமாகத் தேடி வந்தனா். ஏழு தனிப்படைகள் அமைக்கப்பட்டு நாமக்கல், சேலம், ஈரோடு மாவட்டங்களில் விசாரணை நடத்தப்பட்டது.

இந்த நிலையில் ஞாயிற்றுக்கிழமை நள்ளிரவு 2 மணியளவில் இரு சக்கர வாகனத்தில் வந்த இருவா், கடத்தப்பட்ட சிறுமியை அலங்காநத்தம் பெட்ரோல் பங்க் அருகில் விட்டுச் சென்றனா். பின்னா் அங்கிருந்தவா்கள் மூலம் போலீஸாருக்கு தகவல் தெரிவிக்கப்பட்டு அந்த சிறுமி பெற்றோா் வசம் ஒப்படைக்கப்பட்டாா். அவரைக் கடத்தியதாக காளிச்செட்டிப்பட்டியைச் சோ்ந்த தம்பதியான மணிகண்டன் (40), பொன்னுமணி (35) ஆகியோா் கைது செய்யப்பட்டுள்ளனா்.

இச்சம்பவம் குறித்து போலீஸாா் கூறியதாவது:

பணம் கொடுக்கல், வாங்கல் பிரச்னை மற்றும் உறவுமுறையில் இரு குடும்பத்தினருக்கும் இடையே முன்விரோதம் உள்ளதாகத் தெரிகிறது. நள்ளிரவில் மணிகண்டன், பொன்னுமணி இருவரும் சென்று சிறுமியை கண்ணைக் கட்டி கடத்தி வந்துள்ளனா். பின்னா் வீட்டில் ஓா் அறையில் கட்டை அவிழ்த்து விட்டு அடைத்து வைத்துள்ளனா். இதற்கிடையே ரூ.50 லட்சம் கேட்டு கெளசல்யாவை மிரட்டியதுடன், போலீஸாருக்கு தெரியப்படுத்தினால் குழந்தையை கொன்று விடுவதாக எச்சரித்துள்ளனா்.

இதற்கிடையே போலீஸாா் தீவிரமாக விசாரித்து வந்ததால் அச்சமடைந்த தம்பதி சிறுமியை இரு சக்கர வாகனத்தில் அழைத்து வந்து அலங்காநத்தம் அருகே விட்டுச் சென்றுள்ளனா். கைதான இருவரிடமும் தொடா்ந்து விசாரணை நடைபெற்று வருகிறது என்றனா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com