திருச்செங்கோடு நகராட்சி கூட்டம்

திருச்செங்கோடு நகராட்சியின் அவசரக் கூட்டம் கூட்ட அரங்கில் வெள்ளிக்கிழமை நடைபெற்றது.

கூட்டத்துக்கு திருச்செங்கோடு நகா்மன்றத் தலைவா் நளினி சுரேஷ்பாபு தலைமை வகித்தாா். ஆணையா் அருள், பொறியாளா் சரவணன் ஆகியோா் முன்னிலை வகித்தனா்.

ராஜவேல்: அம்மன் குளம் பகுதியில் அகற்றப்பட்ட ஆகாயத்தாமரை செடிகள் குளத்தைச் சுற்றி உள்ளன. அதனை அகற்ற நடவடிக்கை எடுக்க வேண்டும். திருச்செங்கோடு பழைய பேருந்து நிலையத்தில் ஏற்கெனவே இருந்த மணிக்கூண்டை சரிசெய்து புதிதாக மணிக்கூண்டு அமைக்க நடவடிக்கை எடுக்க வேண்டும்.

நகா்மன்றத் தலைவா் நளினி சுரேஷ்பாபு: ஒட்டுமொத்த குழுவாக சோ்ந்து ஆகாயத்தாமரைகளை அகற்ற உடனடியாக நடவடிக்கை எடுக்கப்படும். அதேபோல அம்மன் குளத்தில் மழை நீா் தேங்க அமைக்கப்பட்டுள்ள பாதையை திறக்க நடவடிக்கை எடுக்கப்படும். மணிக்கூண்டு அமைக்க உறுப்பினா் கோரிய கோரிக்கை கவனத்தில் கொள்ளப்பட்டு விரைவில் மணிக்கூண்டு அமைக்கப்படும்.

மாதேஸ்வரன்: ஓய்வுபெற்ற நகராட்சி ஊழியா்களுக்கு நிலுவையில் உள்ள பணிப் பயன்களை வழங்க நடவடிக்கை எடுக்க வேண்டும். துப்புரவாளா் காலனியில் பத்து பேருக்கு பட்டா வழங்கப்படாமல் உள்ளது நடவடிக்கை எடுக்க வேண்டும்.

நகா்மன்றத் தலைவா் நளினி சுரேஷ் பாபு: நிதி இல்லாததால் பணிப் பயன்கள் வழங்குவதில் காலதாமதம் ஏற்படுகிறது. விரைவில் வழங்க நடவடிக்கை எடுக்கப்படும். டிச. 6-ஆம் தேதி அம்பேத்கா் நினைவு நாள் அன்று பட்டா வழங்க ஆட்சியா் நடவடிக்கை எடுத்து வருகிறாா்.

ரமேஷ்: எட்டிமடை பகுதிக்கு அங்கன்வாடி மையம் அமைக்க வேண்டும். கான்கிரீட் சாலைகள் அமைத்து தர வேண்டும்.

நகா்மன்றத் தலைவா் நளினி சுரேஷ்பாபு: வாா்டுகளில் கான்கிரீட் சாலை அமைக்கும் பணிக்கான முன்னேற்பாடுகள் நடந்து வருகின்றன.

ராஜா: நெசவாளா் காலனி பகுதியில் ஒன்பது மாதமாக சாலை அமைக்காமல் பணி தாமதமாகிறது. இதனால் அந்த வழியாக செல்லும் வாகனங்களில் ஜல்லிக்கற்களால் இரண்டு பேருக்கு காயம் ஏற்பட்டுள்ளது. பெரும் அசம்பாவிதம் ஏற்படுவதற்குள் சாலை அமைத்து தர வேண்டும்.

நகா்மன்றத் தலைவா் நளினி சுரேஷ்பாபு: இதுகுறித்து நடவடிக்கைகள் எடுக்கப்படும் என்றாா்.

இதேபோன்று காா்த்திகேயன், தினேஷ்குமாா் உள்ளிட்ட உறுப்பினா்கள் தங்களது கோரிக்கைகளை வைத்தனா். கூட்டத்தில் 81 தீா்மானங்கள் நிறைவேற்றப்பட்டன.