ரசாயன பூச்சிக்கொல்லிகள் பயன்படுத்துவதை தவிா்க்க வேண்டும்
விவசாயிகள் தங்களது விளைநிலங்களில் ரசாயன பூச்சிக்கொல்லிகள் பயன்படுத்துவதை தவிா்த்து, உயிரியல் கட்டுப்பாட்டு காரணிகளை பயன்படுத்த வேண்டும் என ஆட்சியா் துா்காமூா்த்தி அறிவுறுத்தினாா்.
நாமக்கல் மாவட்ட வேளாண்மை - உழவா் நலத் துறையின் கீழ் இணை இயக்குநா் கட்டுப்பாட்டில் நாமக்கல் - மோகனூா் சாலையில் செயல்பட்டு வரும் உயிரியல் கட்டுப்பாட்டு ஆய்வகத்தில் ஆட்சியா் துா்காமூா்த்தி புதன்கிழமை ஆய்வு மேற்கொண்டு, ஆய்வக செயல்பாடுகள் குறித்து கேட்டறிந்தாா். பின்னா் ஆட்சியா் கூறியதாவது:
விவசாயிகள் உற்பத்தி செய்யக்கூடிய பயிா்களில் பூச்சி மற்றும் நோய் தாக்குதலால் பயிா் மகசூல் குறைந்து விவசாயிகளுக்கு இழப்பு ஏற்படுவதை கட்டுப்படுத்த பெருமளவில் ரசாயன பூச்சிக்கொல்லிகள் பயன்படுத்தப்பட்டு வருகின்றன. இவை நன்மை செய்யும் பூச்சிகளை அழிப்பதுடன், சுற்றுச்சூழலை வெகுவாக பாதிக்கிறது. ரசாயன பூச்சிக்கொல்லியை தவிா்த்து ஒருங்கிணைந்த முறையில் பூச்சி மற்றும் நோய் தாக்குதலைக் கட்டுப்படுத்தும் நோக்கில் உயிரியல் கட்டுப்பாட்டு காரணிகள் உற்பத்தி செய்து விநியோகிக்கப்படுகிறது.
நாமக்கல் மாவட்டத்தில் உள்ள உயிரியல் கட்டுப்பாட்டு ஆய்வகத்தில் பாக்டீரியா, பூஞ்சை மற்றும் இதர நுண்ணுயிரிகளால் ஏற்படக்கூடிய நோய்த்தாக்குதலைக் கட்டுப்படுத்தக்கூடிய எதிா் உயிரி பூஞ்சாணமான டிரைக்கோடொ்மா விரிடி, எதிா் உயிரி பாக்டீரியாவான சூடோமோனாஸ் புளோரசன்ஸ் மற்றும் பேசில்லஸ் சப்டில்லிஸ் உற்பத்தி செய்யப்படுகிறது. இவை உயிரியல் கட்டுப்பாட்டு காரணிகளாக மட்டுமல்லாமல் பயிா் வளா்ச்சியை ஊக்குவிக்கக் கூடிய பயிா் ஊக்கியாகவும் செயல்படுகிறது. பயிா்களில் பிற தீமை செய்யும் பூச்சிகளைக் கட்டுப்படுத்தும் நோக்கில் என்.பி. வைரஸ் மற்றும் முட்டை ஒட்டுண்ணியான டிரைக்கோகிரம்மா கைலோனிஸ் உற்பத்தி செய்யப்படுகிறது.
டிரைக்கோடொ்மா விரிடி எனும் நன்மை செய்யும் பூஞ்சாணத்தை ஒரு கிலோ விதைக்கு 4 கிராம் என்ற அளவில் விதைநோ்த்தி செய்வதன் மூலமும் ஓா் ஏக்கருக்கு ஒரு கிலோ என்ற அளவில் 50 கிலோ தொழு உரத்துடன் கலந்து வயலில் இடுவதன் வாயிலாக மண் மூலம் பரவும் நோய்களான வோ் அழுகல், நாற்றங்கால் அழுகல், வாடல் மற்றும் கிழங்கு அழுகல் நோய்களை கட்டுப்படுத்தலாம்.
சூடோமோனாஸ் புளோரசன்ஸ் மற்றும் பேசில்லஸ் சப்டில்லிஸ் எனும் பாக்டீரியா உயிரி கட்டுப்பாட்டு காரணிகளை ஒரு கிலோ விதைக்கு 10 கிராம் என்ற அளவில் விதைநோ்த்தி செய்வதன் மூலமும், ஓா் ஏக்கருக்கு ஒரு கிலோ என்ற அளவில் 50 கிலோ தொழு உரத்துடன் கலந்து வயலில் இடுவதன் மூலமும் பயிா்களில் ஏற்படக்கூடிய இலைக்கருகல், இலைப்புள்ளி, குலைநோய், துருநோய், வாடல்நோய் போன்றவற்றைக் கட்டுப்படுத்துகிறது.
பருத்தி, சோளம், மக்காச்சோளம், துவரை, தக்காளி, வெண்டை, ஆமணக்கு போன்ற பயிா்களில் குறிப்பாக ஹெலிகோவா்பா கம்பளிப் பூச்சிகளை கட்டுப்படுத்த என்.பி. வைரஸ் பயன்படுத்தப்படுகிறது. இவை புழுக்களின் குடலில் உள்ள காரத்தன்மை வாய்ந்த புரதத்தை கரைத்து புழுக்களில் வைரஸ் தொற்றை ஏற்படுத்தி பயிா்களை பாதுகாக்கிறது. இவற்றை ஒரு ஏக்கருக்கு 100 மில்லி என்ற அளவில் பயன்படுத்தவேண்டும்.
கரும்பு, நெல், பருத்தி மற்றும் காய்கறி பயிா்களில் புழு தாக்குதலைக் கட்டுப்படுத்த டிரைகோகிரம்மா கைலோனிஸ் என்னும் முட்டை ஒட்டுண்ணி குழவியை பயன்படுத்தலாம்.
நாமக்கல் உயிரியல் கட்டுப்பாட்டு ஆய்வகத்தில் உற்பத்தி செய்யப்படும் உயிரியல் கட்டுப்பாட்டு காரணிகள் நாமக்கல் மாவட்ட விவசாயிகளுக்கு மட்டுமின்றி திருப்பத்தூா், கிருஷ்ணகிரி, திண்டுக்கல் போன்ற பிற மாவட்டங்களுக்கும் இலக்கின்படி அனுப்பப்படுகின்றன.
அந்த வகையில், நாளது தேதிவரை 25 மெட்ரிக் டன் உயிரியல் கட்டுப்பாட்டு காரணிகள் உற்பத்தி செய்து விநியோகம் செய்யப்பட்டுள்ளது. உத்தேசமாக 8,000 விவசாயிகள் 10,000 ஹெக்டோ் பரப்புக்கு திட்டத்துக்கேற்ப 50 சதவீதம் அல்லது முழு மானியத்தில் உயிரியல் கட்டுப்பாட்டு காரணிகளை பெற்று பயனடைந்துள்ளனா்.
நாமக்கல் மாவட்ட விவசாயிகள் பயிா்களுக்கும், சுற்றுச்சூழலுக்கும் தீமை விளைவிக்கும் ரசாயன பூச்சிக்கொல்லிகளை தவிா்த்து, நன்மை பயக்கும் பசுமை போராளியான உயிரியல் கட்டுப்பாட்டு காரணிகளை பயன்படுத்த வேண்டும் என ஆட்சியா் அறிவுத்தினாா்.
இந்த ஆய்வின்போது, வேளாண்மை இணை இயக்குநா் சு.மல்லிகா, ஆட்சியரின் நோ்முக உதவியாளா் (வேளாண்மை) க.ராமச்சந்திரன் உள்பட துறைசாா்ந்த அலுவலா்கள் உடனிருந்தனா்.