சுதேசி பொருள்களை வாங்கினால் உள்நாட்டு உற்பத்தி அதிகரிக்கும்: பாஜக

சுதேசி பொருள்களை வாங்கினால் உள்நாட்டு உற்பத்தி அதிகரிக்கும் என பாஜக மாநில துணைத் தலைவா் கே.பி.ராமலிங்கம் தெரிவித்தாா்.

நாமக்கல் கிழக்கு மாவட்டத்தில் நவ. 4-ஆம் தேதி தமிழக பாஜக தலைவா் நயினாா் நாகேந்திரன் பங்கேற்கும், ‘தமிழகம் தலை நிமிர, தமிழனின் பயணம்’ என்ற நிகழ்ச்சி நடைபெற உள்ளது. இதையொட்டி, மாவட்ட பாஜக அலுவலகத்தில் முன்னேற்பாடுகள் ஆலோசனைக் கூட்டம் வியாழக்கிழமை நடைபெற்றது.

இதில், மாநில துணைத் தலைவா் கே.பி.ராமலிங்கம், மாநில பொதுச் செயலாளா் கருப்பு எம்.முருகானந்தம் ஆகியோா் நிா்வாகிகளுக்கு ஆலோசனைகளை வழங்கினா். தொடா்ந்து, கே.பி.ராமலிங்கம் செய்தியாளா்களிடம் கூறியதாவது: நாமக்கல் குளக்கரைத் திடலில் நவ. 4-ஆம் தேதி மாலை 6 மணி அளவில் நடைபெறும் பிரசார நிகழ்ச்சியில், மத்திய தகவல் ஒலிபரப்பு மற்றும் நாடாளுமன்ற விவகாரங்கள் துறை இணை அமைச்சா் எல்.முருகன் மற்றும் கூட்டணி கட்சி நிா்வாகிகள் கலந்துகொள்கின்றனா். தமிழகத்தில் பாஜக அங்கம் வகிக்கும் அதிமுக தலைமையிலான கூட்டணி வெற்றியை நோக்கி பயணித்துக் கொண்டிருக்கிறது.

கடந்த சில மாதங்களுக்கு முன்பு பாஜகவின் கோரிக்கைகள், எதிா்க்கட்சித் தலைவா் எடப்பாடி பழனிசாமியின் பிரசாரம் ஆகியவற்றால் நெல் மூட்டைக்கு ரூ. 40 உயா்த்தப்பட்டது. அண்மையில் பெய்த மழையால் விவசாயிகளிடமிருந்து கொள்முதல் செய்யப்பட்ட சுமாா் ஒன்றரை லட்சம் டன் நெல் மூட்டைகள் மழையில் நனைந்து களைகள் முளைத்து பாதிக்கப்பட்டுள்ளன. நெல் மூட்டைகள் பாதிப்புக்கு காரணமாக திமுக அரசு அமைந்துவிட்டது.

நவ. 4-இல் நாமக்கல் கிழக்கு மாவட்டத்தில் நடைபெறும் சுற்றுப்பயணத்தில் பாஜக நிா்வாகிகள், கூட்டணி கட்சி நிா்வாகிகள், முன்னாள் அமைச்சா்கள் கலந்துகொள்வாா்கள்.

பிரதமா் மோடி சுதேசி பொருள்களை பயன்படுத்த வேண்டும் என அறிவிப்பை வெளியிட்டாா். சுதேசி பொருள்களை பொதுமக்கள் வாங்கினால் உள்நாட்டு உற்பத்தி அதிகரிக்கும். சுதேசி பொருள்களை நாம் பயன்படுத்துவதால், கடந்த ஆண்டைவிட இந்த ஆண்டு சீனப் பொருள்களின் விற்பனை 85 சதவீதம் குறைந்துள்ளது. பாஜக எதை நோக்கி பயணிக்கிறது என்பதை இந்நாட்டு மக்கள் புரிந்துகொண்டுள்ளனா் என்றாா்.

தொடா்ந்து, சேந்தமங்கலம் தொகுதி சட்டப் பேரவை உறுப்பினா் கு.பொன்னுசாமி மறைவுக்கு, பாஜக சாா்பில் இரங்கல் தெரிவிப்பதாக அவா் கூறினாா்.

இந்நிகழ்வில், நாமக்கல் கிழக்கு மாவட்ட பாஜக தலைவா் கே.பி.சரவணன், முன்னாள் தலைவா் என்.பி.சத்தியமூா்த்தி, தேசிய பொதுக்குழு உறுப்பினா் சிவப்பிரகாசம், ராசிபுரம் தொகுதி பொறுப்பாளா் முத்துக்குமாா் உள்ளிட்டோா் கலந்துகொண்டனா்.