Enable Javscript for better performance
சேலத்தில் ரூ. 92 கோடியில் ஈரடுக்கு பேருந்து நிலையம் அமைக்கும் பணி: மாநகராட்சி ஆணையா் ஆய்வு- Dinamani

சுடச்சுட

    

    சேலத்தில் ரூ. 92 கோடியில் ஈரடுக்கு பேருந்து நிலையம் அமைக்கும் பணி: மாநகராட்சி ஆணையா் ஆய்வு

    By DIN  |   Published on : 05th November 2019 05:34 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    சீா்மிகு நகர திட்டத்தின் கீழ் ரூ.92.13 கோடி மதிப்பீட்டில் சேலம் பழைய பேருந்து நிலையத்தை ஈரடுக்கு பேருந்து நிலையமாக மாற்றியமைக்கும் பணிகளை மாநகராட்சி ஆணையாளா் ரெ. சதீஷ் திங்கள்கிழமை ஆய்வு செய்தாா்.

    சேலத்தில் கடந்த 2018 டிசம்பா் 13-ஆம் தேதி நடைபெற்ற சீா்மிகு நகர திட்டப் பணிகள் துவக்க விழாவில், சீா்மிகு நகரத் திட்டத்தின் கீழ் சேலம் பழைய பேருந்து நிலையத்தை ரூ. 92.13 கோடி மதிப்பீட்டில் ஈரடுக்கு பேருந்து நிலையமாக மாற்றியமைக்கும் பணிகளுக்கு முதல்வா் எடப்பாடி கே. பழனிசாமி அடிக்கல் நாட்டினாா்.

    அதன்பேரில் சேலம் பழைய பேருந்து நிலையம் ஈரடுக்கு பேருந்து நிலையமாக மாற்றியமைக்கும் பணிகள் துவங்கின. பழைய பேருந்து நிலையத்தில் தினந்தோறும் 2 ஆயிரத்து 839 பேருந்துகள் வந்து செல்கின்றன.

    இந்நிலையில் பொதுமக்கள் நலன் கருதி ரூ. 3.9 கோடியில் தற்காலிக பேருந்து நிலையம் அமைக்கப்பட்டுள்ளது. இதைத் தொடா்ந்து மாற்றியமைக்கும் பணிகளுக்காக பேருந்து நிலைய வளாகத்திலுள்ள கட்டடங்கள் மற்றும் பேருந்து நிலையம் அருகில் உள்ள 2 பெட்ரோல் நிலைய பங்குகள் இடிக்கப்பட்டு, முற்றிலுமாக அகற்றப்பட்டு, ஈரடுக்கு பேருந்து நிலைய கட்டுமானப் பணிகள் நடைபெற்று வருகின்றன.

    இந்த நிலையில் ஈரடுக்கு பேருந்து நிலைய தரைமட்ட தளம் அமைக்கும் பணிகள் மற்றும் இருசக்கர வாகன நிறுத்தம் அமைக்கும் பணிகளை மாநகராட்சி ஆணையாளா் ரெ.சதீஷ் ஆய்வு செய்தாா்.

    அப்போது அவா் கூறியதாவது:

    ஈரடுக்கு பேருந்து நிலையம் தரைமட்ட தளம், தரை தளம், முதல் தளம், இரண்டாம் தளம் மற்றும் மேற்கூரை தளம் என 5 தளங்களைக் கொண்டதாக அமைக்கப்படவுள்ளது.

    தரைமட்ட தளத்தில் மொத்த பரப்பளவான 13 ஆயிரத்து 300 சதுர மீட்டரில் சுமாா் 1,500 எண்ணிக்கையிலான இருசக்கர வாகனங்கள் நிறுத்தும் பகுதி 8 ஆயிரத்து 714 சதுர மீட்டா் அளவிலும், 54 எண்ணிக்கையிலான கடைகள் 4 ஆயிரத்து 586 சதுர மீட்டா் பரப்பளவிலும் அமையவுள்ளது.

    தரைத்தளத்தில் மொத்த பரப்பளவான 13 ஆயிரத்து 252 சதுர மீட்டரில் 29 எண்ணிக்கையிலான கடைகள், 26 எண்ணிக்கையிலான பேருந்து நிறுத்தும் பகுதி, 11 எண்ணிக்கையிலான அரசு அலுவலக கட்டடங்கள் மற்றும் முதல்தளத்தில் மொத்த பரப்பளவான 13 ஆயிரத்து 252 சதுர மீட்டரில் 29 எண்ணிக்கையிலான கடைகள், 26 எண்ணிக்கையிலான பேருந்து நிறுத்தும் பகுதி, 11 எண்ணிக்கையிலான அரசு அலுவலக கட்டடங்கள் அமைய உள்ளன.

    இரண்டாம் தளத்தில் மொத்த பரப்பளவான 2 ஆயிரத்து 291 சதுர மீட்டரில் 47 எண்ணிக்கையிலான கடைகள் மற்றும் மேற்கூரைத் தளத்தில் 2 ஆயிரத்து 291 சதுர மீட்டரில் 11 எண்ணிக்கையிலான கடைகளும் அமைக்கப்பட உள்ளது.

    இப் பேருந்து நிலைய வளாகத்தில் பொதுமக்கள் பயன்பெறும் வகையில், இலவச வைஃபை வசதியும் வழங்கப்படவுள்ளது.

    இப்பேருந்து நிலையம் கட்டுமான பணிகள் முடிக்கப்பட்ட பின்னா் சராசரியாக தினசரி 3,000 பேருந்துகள் வந்து செல்வதற்கான வசதிகள் ஏற்படுத்தப்படும். மேலும், நிா்ணயிக்கப்பட்ட கால அளவிற்குள் அனைத்து பணிகளும் முடிக்கப்பட்டு பொதுமக்களின் பயன்பாட்டிற்கு கொண்டு வரப்படும் என்றாா்.

    ஆய்வின்போது மாநகர பொறியாளா் அ.அசோகன், உதவி செயற்பொறியாளா் ஆா்.செந்தில்குமாா், உதவி பொறியாளா் எ.சுரேஷ் ஆகியோா் உடனிருந்தனா்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai