பேளூா், பெத்தநாயக்கன்பாளையம் பகுதியில் மழைக் காலங்களில் பரவும் காய்ச்சல் உள்ளிட்ட தொற்றுநோய்களைத் தடுக்கும் வகையில், அரசுப் பள்ளி மாணவா்களை சுகாதாரத் தூதுவா்களாக நியமித்து விழிப்புணா்வு ஏற்படுத்தப்பட்டது.
மழைக் காலங்களில் பரவிவரும் காய்ச்சல் உள்ளிட்ட தொற்றுநோய்கள் பரவுவதை முன்கூட்டியே தடுக்கும் வகையில், சேலம் மாவட்டத்தில் பள்ளி, கல்லூரி மாணவா்களை சுகாதாரத் தூதுவா்களாக நியமித்து வீடுதோறும் காய்ச்சல் குறித்த விழிப்புணா்வு ஏற்படுத்தும் பணியில், பேரூராட்சி மற்றும் பொது சுகாதாரத் துறை ஈடுபட்டுள்ளது.
இத் திட்டத்தின் கீழ் பெத்தநாயக்கன்பாளையம் அரசு ஆண்கள் மேல்நிலைப் பள்ளியில் சுகாதாரத் தூதுவா்கள் மாணவா்கள் நியமனம் மற்றும் அவா்களுக்கு விழிப்புணா்வு பயிற்சி புதன்கிழமை நடைபெற்றது.
இந் நிகழ்ச்சிக்குப் பள்ளித் தலைமை ஆசிரியா் மாதேஸ்வரன் வரவேற்றாா். ஆரியபாளையம் வட்டார மருத்துவ அலுவலா் பொன்னம்பலம் தலைமை வகித்தாா்.
பெத்தநாயக்கன் பாளையம் பேரூராட்சி செயல் அலுவலா் பூவேந்திரன் முன்னிலை வகித்தாா். சுகாதாரத் தூதுவா்களாக நியமிக்கப்பட்ட மாணவா்களுக்கு மழைக் காலங்களில் பரவும் காய்ச்சல் மற்றும் தொற்றுநோய்கள் குறித்து மருத்துவா்கள் சுதா்சன், ராதாமணி ஆகியோா் விழிப்புணா்வு ஏற்படுத்தினா்.
சுகாதார தூதுவா்களான மாணவா்கள், வீடுதோறும் சென்று தொற்றுநோய் குறித்து பொதுமக்களுக்கு விழிப்புணா்வு ஏற்படுத்தவும், காய்ச்சல் வந்தால் மேற்கொள்ள வேண்டியவை குறித்தும் விளக்கமளிக்க பயிற்சி அளிக்கப்பட்டது.
நிறைவாக, மாணவா்கள், ஆசிரியா்கள், சுகாதாரப் பணியாளா்கள் அனைவரும் சுகாதார உறுதிமொழி எடுத்துக்கொண்டனா்.
பேளூரில்...
வாழப்பாடியை அடுத்த பேளூா் அரசு ஆண்கள் மேல்நிலைப் பள்ளியில் நடைபெற்ற சுகாதாரத் தூதுவா் நியமனம் மற்றும் விழிப்புணா்வு கருத்தரங்குக்கு பள்ளித் தலைமை ஆசிரியா் திருஞானகணேசன் தலைமை வகித்து விழிப்புணா்வு பிரசாரத்தைத் தொடக்கி வைத்தாா். ஆரம்ப சுகாதார நிலைய மருத்துவா் ராம் ஐஸ்வா்யா, வட்டார சுகாதார அலுவலா் சீனிவாசன் ஆகியோா் பொதுமக்களுக்கும் மாணவா்களுக்கும் விழிப்புணா்வு பயிற்சி அளித்தனா்.
பேளூா் பேரூராட்சியில் வீடுகள்தோறும் மாணவா்கள் பிரசாரத்தில் ஈடுபட்டனா். ஆசிரியா்கள் எம்கோ, தேவராஜன், அருண், ராஜூ, சுகாதார ஆய்வாளா் கோபிநாத் ஆகியோா் உடனிருந்தனா். ஆசிரியா் மணிகண்டன் நன்றி கூறினாா்.