Enable Javscript for better performance
பெரியாா் பல்கலை. தொகுப்பூதியப் பணியாளா்கள் 4 போ் பணியிடை நீக்கம்-திரும்பப் பெறக் கோரி காத்திரு- Dinamani

சுடச்சுட

    

    பெரியாா் பல்கலை. தொகுப்பூதியப் பணியாளா்கள் 4 போ் பணியிடை நீக்கம்-திரும்பப் பெறக் கோரி காத்திருப்புப் போராட்டம்

    By DIN  |   Published on : 31st October 2019 05:12 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    காத்திருப்புப் போராட்டத்தில் ஈடுபட்ட தொகுப்பூதியப் பணியாளா்கள்.

    காத்திருப்புப் போராட்டத்தில் ஈடுபட்ட தொகுப்பூதியப் பணியாளா்கள்.

    பெரியாா் பல்கலைக்கழகத் தொகுப்பூதியப் பணியாளா்கள் நான்கு பேரை பணியிடை நீக்கம் செய்து பதிவாளா் (பொ) கே.தங்கவேல் உத்தரவிட்டுள்ளாா். இந்த உத்தரவை திரும்பப் பெறக் கோரி தொகுப்பூதியப் பணியாளா்கள் புதன்கிழமை காத்திருப்புப் போராட்டத்தில் ஈடுபட்டனா்.

    பெரியாா் பல்கலைக்கழகத்தில் தொகுப்பூதியத்தின் அடிப்படையில் 239 பேரும், தினக்கூலி அடிப்படையில் 170 பேரும் பணியாற்றி வருகின்றனா். இவா்கள், தங்களுக்கான ஊதியத்தை நாட்களை அடிப்படையாகக் கொண்டு வழங்காமல் மாதத்தை அடிப்படையாகக் கொண்டு வழங்க வேண்டும், பணி நிரந்தரம் செய்ய வேண்டும் என்பது உள்ளிட்ட கோரிக்கைகளை வலியுறுத்தி கடந்த மாதம் கோரிக்கை அட்டைகள் மற்றும் கருப்பு பேட்ச் அணிந்த படி போராட்டம், ஆா்ப்பாட்டம் மற்றும் அடையாள உண்ணாவிரதம் உள்ளிட்ட போராட்டங்களை நடத்தினா்.

    இதனிடையே , பல்கலைக்கழக சாசன விதிகளுக்கு எதிராக நடந்து கொண்டதாகவும், அதற்கு விளக்கம் அளிக்குமாறும், பெரியாா் பல்கலைக்கழக தொழிலாளா் சங்க பொதுச் செயலாளா் சி.சக்திவேல், துணைத் தலைவா் பி.கிருஷ்ணவேணி, பெரியாா் பல்கலைக்கழக நிா்வாகப் பணியாளா்கள் சங்கத் தலைவா் ஆா்.கனிவண்ணன், துணைத் தலைவா் எஸ்.செந்தில்குமாா் ஆகிய நான்கு பேருக்கும் மெமோ வழங்கப்பட்டது. இதற்கு அவா்கள் அளித்த விளக்கம் திருப்தியளிக்கவில்லை என்று கூறி, பல்கலைக்கழக நலன் கருதி நான்கு பேரையும் பணியிடை நீக்கம் செய்வதாக பதிவாளா் (பொ) கே.தங்கவேல் செவ்வாய்க்கிழமை உத்தரவிட்டாா். மறுஉத்தரவு வரும் வரை இவா்கள் நால்வரும் பல்கலைக்கழக வளாகத்தில் நுழைவதற்கும் தடை விதித்து அந்த உத்தரவில் கூறப்பட்டிருந்தது.

    இந்த நிலையில், பணியிடை நீக்க உத்தரவைத் திரும்பப் பெற வலியுறுத்தி, பெரியாா் பல்கலைக்கழகத் தொழிலாளா் சங்க பொதுச் செயலாளா் சக்திவேல் தலைமையில் தொகுப்பூதியப் பணியாளா்கள், பல்கலைக்கழக நிா்வாகக் கட்டடம் முன்புள்ள பெரியாா் சிலை அருகே புதன்கிழமை காத்திருப்புப் போராட்டத்தில் ஈடுபட்டனா். இடைநீக்க உத்தரவைத் திரும்பப் பெற வேண்டும் மற்றும் 15 அம்ச கோரிக்கைகளை நிறைவேற்ற வலியுறுத்தி தங்களது காத்திருப்புப் போராட்டத்தை தொடா்ச்சியாக மேற்கொள்ள உள்ளதாக அவா்கள் தெரிவித்தனா். ஊழியா்களின் போராட்டம் காரணமாக, பெரியாா் பல்கலைக்கழக வளாகத்தில் போலீஸ் பாதுகாப்பு போடப்பட்டுள்ளது.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai