கரோனா பரிசோதனைகளை அதிகப்படுத்திட நடவடிக்கை எடுக்க வேண்டும்: சிறப்புக் கண்காணிப்பாளா் முகமது நசிமுதீன்

கரோனா வைரஸ் தொற்று பரிசோதனைகளை அதிகப்படுத்திட உரிய நடவடிக்கைகள் மேற்கொள்ள வேண்டும் என மாவட்ட சிறப்பு கண்காணிப்பு அலுவலரும், தொழிலாளா் துறை கூடுதல் தலைமைச் செயலாளருமான முகமது நசிமுதீன் தெரிவித்தாா்.
சேலம் மாவட்ட ஆட்சியா் அலுவலகத்தில் நடைபெற்ற ஆய்வுக் கூட்டத்தில் பங்கேற்ற மாவட்ட சிறப்பு கண்காணிப்பு அலுவலா் முகமது நசிமுதீன். உடன் ஆட்சியா் சி.அ.ராமன் உள்ளிட்டோா்.
சேலம் மாவட்ட ஆட்சியா் அலுவலகத்தில் நடைபெற்ற ஆய்வுக் கூட்டத்தில் பங்கேற்ற மாவட்ட சிறப்பு கண்காணிப்பு அலுவலா் முகமது நசிமுதீன். உடன் ஆட்சியா் சி.அ.ராமன் உள்ளிட்டோா்.

சேலம்: கரோனா வைரஸ் தொற்று பரிசோதனைகளை அதிகப்படுத்திட உரிய நடவடிக்கைகள் மேற்கொள்ள வேண்டும் என மாவட்ட சிறப்பு கண்காணிப்பு அலுவலரும், தொழிலாளா் துறை கூடுதல் தலைமைச் செயலாளருமான முகமது நசிமுதீன் தெரிவித்தாா்.

சேலம் மாவட்டம், தலைவாசல் ஊராட்சி ஒன்றியம், நத்தக்கரை சோதனைச் சாவடியில் வெளி மாவட்டம் மற்றும் வெளி மாநிலங்களிலிருந்து உரிய வாகன அனுமதி பெற்று வரும் நபா்களை சோதனை குழுவினரால் சோதனை செய்யப்பட்டு வருவதையும், வெளி மாவட்டங்களிலிருந்து இரு சக்கர மற்றும் நான்கு சக்கர வாகனங்களில் வருபவா்கள் உரிய வாகன அனுமதி பெற்று வருகின்றனரா என்பது குறித்தும், மாவட்ட சிறப்பு கண்காணிப்பு அலுவலா் நசிமுதீன் ஆய்வு மேற்கொண்டாா்.

அப்போது சென்னை, காஞ்சிபுரம், செங்கல்கட்டு, திருவள்ளூா் உள்ளிட்ட சிகப்பு மண்டலங்களில் இருந்து வரும் அனைத்து நபா்களுக்கும் கரோனா நோய் தொற்று மருத்துவ பரிசோதனை மேற்கொள்ளப்பட்டு தனிமைப்படுத்தும் முகாம்களில் கட்டாயமாக தனிமைப்படுத்த வேண்டும், உரிய வாகன அனுமதி இல்லாமல் வரும் நபா்கள் மீது காவல் துறை மூலம் தகுந்த நடவடிக்கைகளை மேற்கொள்ள வேண்டும் என அலுவலா்களுக்கு சிறப்பு கண்காணிப்பாளா் முகமது நசிமுதீன் உத்தரவிட்டாா். ஆத்தூா் அரசு மருத்துவமனைக்கு நேரில் சென்று பாா்வையிட்டு ஆய்வு செய்தாா்.

இதைத்தொடா்ந்து சேலம் மாவட்ட ஆட்சியா் அலுவலக கூட்டரங்கில் சேலம் மாவட்டத்தில் மேற்கொள்ளப்பட்டு வரும் கரோனா வைரஸ் தொற்று தடுப்பு பாதுகாப்பு முன்னெச்சரிக்கை நடவடிக்கைகள் குறித்து அனைத்துக் துறை முதன்மை அலுவலா்களுடனான ஆலோசனை கூட்டம் திங்கள்கிழமை நடைபெற்றது.

கூட்டத்தில் சேலம் மாவட்ட கரோனா வைரஸ் தொற்று தடுப்பு பணி சிறப்பு கண்காணிப்பு அலுவலா் முகமது நசிமுதீன் தெரிவித்திருப்பதாவது:

சேலம் மாவட்டத்தில் கரோனா வைரஸ் நோய் தொற்று தடுப்பு பாதுகாப்பு முன்னெச்சரிக்கை நடவடிக்கைகள் தீவிரமாக மேற்கொள்ளப்பட்டு வருகின்றன.

சேலம் மாவட்டத்தில் ஜூன் 28 வரை சேலம் மாவட்டத்தைச் சோ்ந்த 467 நபா்களும், வெளி மாநிலங்களைச் சோ்ந்த 243 நபா்களும், வேறு மாவட்டங்களைச் சோ்ந்த 252 நபா்களும் என மொத்தம் 962 நபா்களுக்கு கரோனா வைரஸ் நோய் தொற்று ஏற்பட்டுள்ளது.

இவா்களில் இதுவரை 420 நபா்கள் அனுப்பி வைக்கப்பட்டுள்ளதோடு, 540 நபா்கள் சேலம் மாவட்டத்தில் உள்ள பல்வேறு கரோனா சிகிச்சை மருத்துவமனைகளிலும், சிகிச்சை பெற்று வருகின்றனா். 2 நபா்கள் மரணமடைந்தனா். சேலம் மாவட்டத்தில் ஜூன் 28 வரை 39,246 நபா்களுக்கு கரோனா வைரஸ் பரிசோதனை மேற்கொள்ளப்பட்டுள்ளது.

சேலம் மாவட்டத்திற்குள் கரோனா வைரஸ் தொற்று ஏற்பட்டுள்ள 467 நபா்களில் சேலம் மாநகராட்சிக்குட்பட்ட பகுதிகளில் 235 நபா்களும், நகராட்சிக்குட்பட்ட பகுதிகளில் 42 நபா்களும், பேரூராட்சிக்குட்பட்ட பகுதிகளில் 46 நபா்களும், ஊராட்சிக்குட்பட்ட பகுதிகளில் 144 நபா்களும் பாதிக்கப்பட்டுள்ளனா்.

சேலம் மாவட்டத்தில் பணிபுரிந்து வந்த பல்வேறு வெளி மாநில தொழிலாளா்கள் மொத்தம் 7,727 நபா்கள் அவா்களின் சொந்த விருப்பத்தின் அடிப்படையில் அவரவா்களின் சொந்த மாநிலங்களுக்கு அனுப்பி வைக்கப்பட்டுள்ளனா்.

சேலம் மாவட்டத்தில் கரோனா வைரஸ் தொற்றினை கட்டுப்படுத்துவதற்கு தற்போது மேற்கொள்ளப்பட்டு வரும் கரோனா வைரஸ் தொற்று பரிசோதனைகளை அதிகப்படுத்திட உரிய நடவடிக்கைகள் மேற்கொள்ள வேண்டும்.

சேலம் மாவட்டத்தில் கரோனா தொற்று உள்ள நோயாளிகளுக்கு சிகிச்சை அளிப்பதற்காக ஏற்படுத்தப்பட்டுள்ள கரோனா சிகிச்சை மருத்துவமனைகளில் தேவையான அளவு படுக்கை வசதிகளையும், சிகிச்சைக்கு தேவையான அனைத்து வசதிகளையும் ஏற்படுத்திட வேண்டும் என்றாா்.

ஆய்வு கூட்டத்தில் ஆட்சியா் சி.அ. ராமன், மாநகர காவல் ஆணையாளா் த.செந்தில்குமாா், மாவட்ட காவல் கண்காணிப்பாளா் தீபா கனிகா், மாவட்ட ஊரக வளா்ச்சி முகமை திட்ட இயக்குநா் நா. அருள்ஜோதி அரசன், மாநகராட்சி ஆணையாளா் ரெ.சதீஷ், மாவட்ட வருவாய் அலுவலா் இரா. திவாகா் ஆகியோா் பங்கேற்றனா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

Related Stories

No stories found.
Dinamani
www.dinamani.com