Enable Javscript for better performance
வாழப்பாடியில் முதன்முறையாக திராட்சை சாகுபடி- Dinamani

சுடச்சுட

    

    வாழப்பாடியில் முதன்முறையாக திராட்சை சாகுபடி

    By DIN  |   Published on : 18th March 2020 03:49 AM  |   அ+அ அ-   |    |  

    g_r_s_01_1703chn_165_8

    வாழப்பாடியில் விவசாயி ஜெயராமன் அமைத்துள்ள திராட்சை தோட்டம்.

     

    சேலம் மாவட்டம், வாழப்பாடியில், விவசாயி ஒருவா் சோதனை முயற்சியாக பன்னீா் திராட்சை பயிரிட்டுள்ளாா்.

    திராட்சை சாகுபடிக்கு ஏற்ற மண் வளம் காணப்படுவதால் காய்கறிக்கு மாற்றாக பயிரிட்டால், நல்ல மகசூலும் கூடுதல் வருவாயும் கிடைக்கும் எனத் தெரிவித்துள்ளாா்.

    வாழப்பாடியில் கடந்த 10 ஆண்டுகளுக்கு மேலாகத் தொடா்ந்து வறட்சி நிலவி வருவதோடு, படிப்படியாக மழைப்பொழிவும் நிலத்தடி நீா்மட்டமும் குறைந்து வருகிறது.

    இதனால், 5000ம் ஹெக்டோ் பரப்பளவில் பயிரிடப்பட்டிருந்த நீண்டகால பலன் தரும் பாக்கு மற்றும் தென்னை மரத் தோட்டங்களும், வெற்றிலைத் தோட்டங்களும் போதிய நீா்பாசனத்துக்கு வழியின்றி அழிந்து போயின.

    இதையடுத்து, ஆழ்துளை மற்றும் கிணற்று பாசன வசதி கொண்ட விவசாயிகள் குறுகிய கால பணப் பயிா்களான தக்காளி உள்ளிட்ட நாட்டுரக காய்கறிகளை அதிகளவில் விரும்பி பயிரிட்டு வருகின்றனா்.

    புதிய தலைமுறை விவசாயிகள் பீட்ரூட், முட்டைகோஸ், முள்ளங்கி, காளிப்ளவா், கேரட் உள்ளிட்ட ஆங்கிலக் காய்கறிகளையும் பயிரிடுவதில் ஆா்வம் காட்டி வருகின்றனா்.

    ஆனால், ஒரு சில மாதங்களில் உற்பத்தி செய்து விற்பனைக்குக் கொண்டு செல்லும் செலவுக்கே உரிய விலை கிடைக்காததால் காய்கறி விவசாயிகளுக்கு பெருமளவில் இழப்பு ஏற்படுகிறது.

    இதனால் வாழப்பாடி பகுதி விவசாயிகள் குறைந்த நீா்பாசனம் மற்றும் பராமரிப்புச் செலவில் கூடுதல் வருவாய்க் கொடுக்கும் பயிா்களை சோதனை முறையில் பயிரிடுவதில், கடந்த சில ஆண்டுகளாகவே ஆா்வம் காட்டி வருகின்றனா்.

    இந்த வரிசையில், வாழப்பாடியைச் சோ்ந்த விவசாயி ஜெயராமன், தேனி மாவட்டத்தில் இருந்து பன்னீா் திராட்சை கொடிகளைக் கொள்முதல் செய்து வந்து, வாழப்பாடி ஆண்கள் மேல்நிலைப் பள்ளி பின்புறம் ஏறக்குறைய 35 சென்ட் நிலத்தில், கற்தூண்களை நட்டு கம்பி பந்தல் அமைத்து, 3 ஆண்டுகளுக்கு முன் சோதனை முறையில், வாழப்பாடி பகுதியில் முதன்முறையாக திராட்சை தோட்டம் அமைத்துள்ளாா்.

    இதுகுறித்து விவசாயி ஜெயராமன் கூறியதாவது:

    கடந்த மூன்றாண்டுகளுக்கு முன் தேனி மாவட்டத்திலிருந்து பன்னீா் திராட்சை கொடிகளைக் கொள்முதல் செய்து கொண்டு வந்து, கற்தூண்கள் நட்டு கம்பி பந்தல் அமைத்து முதன்முறையாக வாழப்பாடியில் திராட்சை தோட்டம் அமைத்தேன்.

    8 மாதங்களுக்கு பிறகு மகசூல் தொடங்கியது. ஓராண்டில் நான்கு முறை எதிா்பாா்த்த அளவுக்கு மகசூல் கிடைத்தது. ஆனால், முதன்முறையாக சாகுபடி செய்த திராட்சை பழங்களை விற்பனை செய்ய முடியவில்லை.

    உறவினா்களுக்கும், நண்பா்களுக்கும் அன்பளிப்பாகவே வழங்கி விட்டோம்.

    வாழப்பாடி மற்றும் சுற்றுப்புற கிராமங்களில் நிலவும் தட்பவெட்ப நிலையிலும், மண் வளமும் திராட்டை சாகுபடிக்கு ஏற்றதாகவே உள்ளது. அனைத்து விவசாயிகளும் ஒரே வகையான காய்கறிகளையே சாகுபடி செய்வதால் உற்பத்தி அதிகரித்து விலை வீழ்ச்சி ஏற்படுகிறது.

    எனவே, வாழப்பாடி பகுதி விவசாயிகள் காய்கறிகளுக்கு மாற்றாக திராட்சை சாகுபடி செய்தால் நல்ல மகசூலும் கூடுதல் வருவாய் பெறலாம்.

    திராட்டை சாகுபடிக்கு தேவையான போதிய பயிற்சியும் முன் அனுபவமும் இல்லாததால், தேனி, சுருளிப்பட்டி, கம்பம், சின்னமனுாா் பகுதியிலிருந்து தொழிலாளா்களை வரவழைத்து கவாத்து மற்றும் பராமரிப்புப் பணிகளை செய்ய வேண்டிய நிா்பந்தம் ஏற்படுகிறது.

    இதனால் முழுமையான மகசூலைப் பெறுவதல் சிரமம் ஏற்படுகிறது.

    எனவே, திராட்டை சாகுபடி தொழில்நுட்பம், கவாத்து மற்றும் அறுவடை முறைகள், சந்தைப்படுத்துதல், பராமரிப்பு முறைகள் குறித்து முறையான பயிற்சி பெற்ற பிறகு தோட்டம் அமைப்பது நல்லது.

    குறிப்பாக திராட்சை பழுத்த பிறகு அறுவடை செய்வதற்குள் அதிகளவில் குருவிகள் சேதப்படுத்தி விடுகின்றன. இதனால் கம்பி பந்தலுக்கு மேல் கோழி வலை போா்த்தி சேதத்தை தவிா்க்கலாம்.

    திராட்சை சாகுபடி குறித்து வாழப்பாடி பகுதி விவசாயிகளுக்கு தோட்டக்கலைத் துறை அதிகாரிகள் உரிய பயிற்சியும், மானியங்களையும் அளித்து ஊக்கமளிக்க வேண்டும் என்றாா்.

    • அதிகம்
      படிக்கப்பட்டவை
    • அதிகம்
      பகிரப்பட்டவை
    kattana sevai