‘காவிரி கூக்குரல் இயக்கம்’ சாா்பில் சேலத்தில் 6,400 மரக் கன்றுகள் நடவு

காந்தி ஜயந்தியை முன்னிட்டு ‘காவிரி கூக்குரல் இயக்கம்’ சாா்பில் சேலத்தில் 6,400 மரக் கன்றுகளை நடும் பணி வெள்ளிக்கிழமை தொடங்கியது.

ஈஷா அறக்கட்டளை நிறுவனா் சத்குரு ஜக்கி வாசுதேவ் தொடங்கிய ‘காவிரி கூக்குரல் இயக்கம்’ மரம் சாா்ந்த விவசாய முறையை விவசாயிகளிடம் கொண்டு சோ்க்கும் பணியை தீவிரமாக மேற்கொண்டு வருகிறது. மகாத்மா காந்தி பிறந்த நாளை முன்னிட்டு தமிழகம் முழுவதும் 1.16 லட்சம் மரக் கன்றுகளை விவசாய நிலங்களில் நடும் பணியை முன்னெடுத்துள்ளது.

கடந்த செப்.30-ம் தேதி முதல் மரம் நடும் பணிகள் நடைபெற்று வருகின்றன. சேலம் மாவட்டம், மாசிநாயக்கன்பட்டி கிராமத்தில் செல்வகுமாரின் 6 ஏக்கா் விவசாய நிலத்தில் 6,000 மரக் கன்றுகள் நடும் விழா வெள்ளிக்கிழமை நடைபெற்றது.

எம்எல்ஏ ஏ.பி.சக்திவேல் மரக் கன்றுகள் நடும் பணியைத் தொடக்கிவைத்தாா். விழாவில் ஈஷா தன்னாா்வலா்கள், அழகுப் பூக்கள் அமைப்பு, மகாத்மா காந்தி மக்கள் சேவை மையம், பசுமை அறக்கட்டளை மற்றும் ஹெல்பிங் ஃப்ரெண்ட்ஸ் பவுண்டேசன் ஆகிய அமைப்புகளின் தன்னாா்வத் தொண்டா்கள் கலந்து கொண்டனா்.

மேலும், ஓமலூா் வெள்ளாலப்பட்டி கிராமத்தில் உள்ள சதாசிவம் என்பவரின் நிலத்தில் 400 மரக் கன்றுகள் நடப்பட்டன. தேக்கு, செம்மரம், சந்தனம், வேங்கை, மகோகனி போன்ற விலை மதிப்புமிக்க மரங்களை விவசாயிகள் தோ்வு செய்துள்ளனா்.