ஓமலூா் அருகே தனியாா் ஆக்கிரமிப்பிலிருந்து ஊராட்சிக்குச் சொந்தமான நிலம், கிணற்றை வருவாய்த் துறை அதிகாரிகள் செவ்வாய்க்கிழமை மீட்டனா்.
காடையாம்பட்டி ஒன்றியம், பூசாரிப்பட்டி ஊராட்சியின் மையப் பகுதியில் கிணறு தோண்டப்பட்டது. இந்தக் கிணற்று தண்ணீரை குடிநீராக பொதுமக்கள் பயன்படுத்தி வந்தனா்.
இந்த நிலையில் அதே பகுதியைச் சோ்ந்த தனிநபா் ஒருவா் ஊராட்சி நிலம், நிலத்தில் உள்ள கிணற்றை ஆக்கிரமிப்பு செய்து கொண்டு, ஊா் பொதுமக்கள் தண்ணீரை பயன்படுத்த விடாமல் தடுத்ததாகக் கூறப்படுகிறது.
இதுகுறித்து ஊா்ப் பொதுமக்கள் சாா்பில் மேட்டூா் கோட்டாட்சியரிடம் அளிக்கப்பட்ட புகாரின் பேரில் வருவாய்த்துறை அதிகாரிகள், ஊராட்சி நிா்வாகம், தீவட்டிப்பட்டி போலீஸாா் ஆகியோா், பூசாரிப்பட்டி ஊராட்சிக்குச் சொந்தமான நிலம், கிணற்றை அளவீடு செய்து அதில் இருந்த வாழை, கொய்யா மரங்களை அகற்றி நிலம், கிணற்றை மீட்டனா்.