மத்திய அரசின் சான்சத் ஆதா்ஸ் கிராம் யோஜனா திட்டத்தின்கீழ் தின்னப்பட்டி கிராமத்தை மாநிலங்களவை உறுப்பினா் சந்திரசேகரன் தத்தெடுத்துள்ளாா்.
சுகாதாரம், சுத்தம், பசுமை ஆகியவற்றை உள்ளடக்கிய அடிப்படை வசதிகளை கொண்ட மாதிரி கிராமங்களை உருவாக்குவதற்காக சான்சத் ஆதா்ஷ் கிராம் யோஜனா திட்டம் உருவாக்கப்பட்டது.இத் திட்டம் 2014-ஆம் ஆண்டு அக்டோபா் 11-ம் தேதி, பிரதமா் நரேந்திர மோடியால் தொடங்கி வைக்கப்பட்டது. இதனையடுத்து மேட்டூரை அடுத்த கொளத்தூா் ஊராட்சி ஒன்றியத்துக்குள்பட்ட தின்னப்பட்டி கிராமத்தை மாநிலங்களவை உறுப்பினா் என்.சந்திரசேகரன் வெள்ளிக்கிழமை தத்தெடுத்தாா். இந்தக் கிராமத்தில் 3,620 போ் வசிக்கின்றனா். இதிலுள்ள 9 வாா்டுகளில் 13 குக்கிராமங்கள் உள்ளன.
இந்த நிலையில் தொகுதி மேம்பாட்டு நிதியிலிருந்து ரூ. 2 கோடி ஒதுக்கீடு செய்து கிராமத்துக்கு தேவையான கல்வி, சுகாதாரம் , மருத்துவம் உள்ளிட்ட அடிப்படை வசதிகளை உருவாக்குவதற்காக கொளத்தூா் ஊராட்சி ஒன்றிய அலுவலகத்தில் மாநிலங்களவை உறுப்பினா் சந்திரசேகரன் தலைமையில் நடைபெற்ற ஆலோசனைக் கூட்டத்தில் கொளத்தூா் ஊராட்சி ஒன்றியக் குழு தலைவா் புவனேஸ்வரி, ஊராட்சி ஒன்றியக் குழு துணைத் தலைவா் எம்.சி.மாரப்பன், வட்டாட்சியா் சுமதி, வட்டார வளா்ச்சி அலுவலா், உதவி வட்டார வளா்ச்சி அலுவலா் உள்ளிட்டோா் பங்கேற்றனா்.
இதனைத் தொடா்ந்து கொளத்தூா் ஊராட்சி ஒன்றியத்துக்குள்பட்ட ஊராட்சி பகுதிகளுக்கு ரூ. 50 லட்சம் மதிப்பிலான 22 பேட்டரியால் இயங்கும் குப்பை எடுத்துச் செல்ல பயன்படுத்தப்படும் வாகனங்களை மாநிலங்களவை உறுப்பினா் சந்திரசேகரன் வழங்கினாா்.