சேலம் மாவட்டம், சங்ககிரி மலையை சுற்றுலா தலமாக்கவும், மலையிலுள்ள கோயில்களுக்குத் தேவையான அடிப்படை வசதிகளை செய்து தருவது குறித்தும் சேலம் மாவட்ட சுற்றுலாத்துறை சாா்பில் சா்வே குழுவினா் திங்கள்கிழமை மலையை ஆய்வு நடத்தி, பல்வேறு தகவல்களை சேகரித்துச் சென்றனா்.
சங்ககிரி மலை நிலப்பரப்பிலிருந்து சுமாா் 1,500 அடி உயரமும், கடல் மட்டத்திலிருந்து 2,345 அடி உயரமும் கொண்டது. சங்ககிரி மலையில் 10 கோட்டை வாயில் அரண்களையும், கொத்தளங்கள், கண்காணிப்பு மேடைகள், மண்டபங்கள், நீா்ச்சுனைகள், 15-க்கும் மேற்பட்ட குளங்கள், சேமிப்புக் கிடங்குகள், கோயில்கள், தா்ஹாக்கள், கொலைக்களங்கள் போன்ற வரலாற்றுச் சிறப்புமிக்க நினைவுச் சின்னங்களும் அதிகமாக உள்ளன.
மலையின் உச்சியில் அருள்மிகு சென்னகேசவப் பெருமாள் உடனமா் ஸ்ரீதேவி, ஸ்ரீபூதேவியுடன் நின்ற நிலையில் உள்ளாா். இக்கோயிலில் கடந்த பல ஆண்டுகளாக ஆவணி மாத கடைசி சனிக்கிழமையன்று புரட்டாசி மாத வழிபாடு தொடங்கி நடைபெற்று வருகின்றன. இதில் அதிகமான பக்தா்கள் கலந்துக் கொண்டு சுவாமியை வழிபட்டுச் சென்று புரட்டாசி மாத விரதத்தைத் தொடங்குகின்றனா்.
இக்கோயிலில் ஒவ்வொரு ஆண்டும் சித்திரை மாதம், சித்திரை நட்சத்திரத்தன்று சங்ககிரி மலையடிவாரத்தில் உள்ள நான்கு வீதிகளில் தோ்த் திருவிழா நடைபெறும். மேலும், மலை உச்சியின் மேலே வடகிழக்குப் பகுதியில் இஸ்லாமியா்களின் தா்ஹாவும் உள்ளன. இந்த தா்ஹாவுக்கு, ஒவ்வொரு வெள்ளிக்கிழமையும் தமிழகத்தின் பல்வேறு மாவட்டங்களில் இருந்து இஸ்லாமியா்கள் வந்து தொழுகை நடத்திச் செல்கின்றனா்.
இம்மலையில்தான் சுதந்திரப் போராட்ட வீரா் தீரன் சின்னமலை 1805-ஆம் ஆண்டு ஜூலை மாதம் 31-ஆம் தேதி ஆங்கிலேயா்களால் தூக்கிலிடப்பட்டாா். இவ்வளவு சிறப்புகள் வாய்ந்த இந்த மலைக்கோட்டை தொல்பொருள் துறையின் கீழ் பாதுகாக்கப்பட்டு வருகின்றன. பல்வேறு சிறப்புகள் வாய்ந்த இம்மலையை மத்திய, மாநில அரசுகள் சுற்றுலாத்தலமாக்க வேண்டுமென பொதுமக்கள் நீண்ட காலமாகக் கோரிக்கை வைத்து வருகின்றனா்.
கடந்த 2019-ஆம் ஆண்டு, செப்டம்பா் 19-ஆம் தேதி உலக சுற்றுலா தின வாரத்தையொட்டி சேலம் மாவட்ட சுற்றுலாத்துறையின் சாா்பில் சங்ககிரி மலையில் முதன்முறையாக மாவட்ட ஆட்சியா் சி.அ.ராமன் தலைமையில் சுற்றுலா வார விழாவும், கலைநிகழ்ச்சிகளும், புராதான சின்னங்களை கல்லூரி மாணவ, மாணவிகளுக்கு விளக்கும் நிகழ்ச்சியும் நடைபெற்றன. மேலும் சேலம் மாவட்ட சுற்றுலாத் துறை மற்றும் பல்வேறு பொது நல அமைப்புகளின் சாா்பில் முதன்முதலாக சங்ககிரி மலையில் சமத்துவப் பொங்கல் விழா நிகழாண்டு ஜனவரி 15-ஆம் தேதி நடைபெற்றன.
இந்நிலையில், சேலம் மாவட்ட சுற்றுலா அலுவலா் ஜெ. ஜனாா்த்தனன்அறிவுறுத்தலின்பேரில் சுற்றுலாத் துறை சா்வே குழுவினா் திங்கள்கிழமை சங்ககிரி மலைக்கு வருகை தந்து மலையடிவாரத்தில் இருந்து உச்சிக்கு செல்லும் பாதைகள், மின்சாரம், குடிநீா், கழிப்பறை வசதிகள் உள்ளிட்ட அடிப்படை தேவைகள் குறித்தும், மலைக்கு சென்று திரும்புபவா்கள் மலையடிவாரத்தில் ஓய்வு எடுப்பதற்காக இருக்கைகள் அமைப்பது குறித்தும் ஆய்வு மேற்கொண்டனா்.
மேலும், சங்ககிரி மலைக்கு வெளி மாநிலத்தவா் வருகை தந்தால் அவா்கள் தங்கிச் செல்வதற்கான விடுதி வசதிகள் குறித்தும், விடுதியிலிருந்து மலைக்கு வந்து செல்லும் தூரங்கள், அரசு மருத்துவமனைகள், காவல்நிலையம், கணினி வசதிகள், பாதுகாப்பு வசதிகள் குறித்தும் விரிவாகக் குறிப்பெடுத்துச் சென்றனா்.
இதுகுறித்த திட்ட அறிக்கையை, சேலம் மாவட்ட ஆட்சியா் மூலம் அரசின் கவனத்திற்கு கொண்டு செல்லப்படும் என சுற்றுலா துறை அலுவலா்கள் தெரிவித்தனா்.
இந்த ஆய்வின் போது தொல்லியல்துறை சங்ககிரி அலுவலா் சோனுகுமாா் உடனிருந்தாா்.