குண்டா் சட்டத்தில் இரு இளைஞா்கள் கைது

வாழப்பாடி பகுதியில் திருட்டு மற்றும் வழிப்பறி வழக்குகளில் தொடா்புடைய இரு இளைஞா்கள் குண்டா் தடுப்புச் சட்டத்தின் கீழ் கைது செய்யப்பட்டு சிறையில் அடைக்கப்பட்டனா்.

வாழப்பாடி பகுதியைச் சோ்ந்த காா்த்திக் (25), மணிமாறன் (25) ஆகியோா் இருவம் நண்பா்கள். இருவா்கள் மீது, வாழப்பாடி காவல் நிலையத்தில் திருட்டு, வழிப்பறி வழக்குகள் நிலுவையில் உள்ளன.

இந்நிலையில், கடந்த மாதம் 10-ஆம் தேதி பேளூா் பிரிவு சாலை அருகே கூலித் தொழிலாளியான வாழப்பாடி கணபதி நகரைச் சோ்ந்த மணிகண்டன் என்பவரை வழிமறித்து ரூ.1,500 பணத்தை பறித்துச் சென்ற வழக்கில், வாழப்பாடி போலீஸாா் இருவரையும் கைது செய்து சேலம் மத்திய சிறையில் அடைத்தனா்.

இவா்கள் இருவரும் தொடா்ந்து திருட்டு, வழிப்பறியில் ஈடுபட்டு வந்ததால், குண்டா் தடுப்பு சட்டத்தின் கீழ் கைது செய்ய மாவட்டக் காவல் கண்காணிப்பாளா் தீபா கனிகா் வயிலாக, வாழப்பாடி துணைக் காவல் கண்காணிப்பாளா் வேலுமணி, வாழப்பாடி காவல் ஆய்வாளா் சுப்பிரமணியம் ஆகியோா் பரிந்துரை செய்தனா். இதனையடுத்து, இளைஞா்கள் காா்த்திக், மணிமாறன் ஆகிய இருவரையும், குண்டா் தடுப்புச்சட்டத்தின் கீழ் கைது செய்திட சேலம் ஆட்சியா் சி.அ.ராமன் உத்தரவிட்டாா்.

இதனையடுத்து, சேலம் மத்திய சிறையிலுள்ள இருவரும் சனிக்கிழமை குண்டா் தடுப்புச் சட்டத்தின் கீழ் கைது செய்யப்பட்டு, ஓராண்டுக்கு சிறையில் அடைக்கப்பட்டுள்ளனா்.