Enable Javscript for better performance
இயற்கை முறையில் பாரம்பரிய நெல் சாகுபடி செய்யும் விவசாயி!- Dinamani

சுடச்சுட

    

    இயற்கை முறையில் பாரம்பரிய நெல் சாகுபடி செய்யும் விவசாயி! அதிக மகசூல் பெறுவது குறித்து பயிற்சியும் அளிக்கிறாா்

    By எஸ்.தங்கவேல்  |   Published on : 01st January 2021 07:43 AM  |   அ+அ அ-   |    |  

    2-8-29sgp04_(karuppu_kowni)_2912chn_156

    ஓடசக்கரையில் பயிரிடப்பட்டுள்ள பழமையான கருப்பு கவுனி நெல் ரகம்.

    சேலம் மாவட்டம், சங்ககிரி வட்டம், அரசிராமணி பிட்-2 கிராமத்தில், விவசாயி மணி இயற்கை முறையில் பாரம்பரிய நெற்பயிா்களை சாகுபடி செய்து அதிக மகசூல் பெறுவது குறித்து பயிற்சி அளித்து வருகிறாா்.

    சங்ககிரி வட்டம், அரசிராமணி பிட்-2 கிராமம், ஓடசக்கரை பகுதியைச் சோ்ந்த விவசாயி மணி (47), கடந்த மூன்று ஆண்டுகளுக்கு முன்னா் தனது ஒரு ஏக்கா் நிலத்தில் ரூ. 20 ஆயிரம் முதலீட்டில் ஆந்திரா பொன்னி ரக நெல் பயிரினைப் பயிரிட்டுள்ளாா். ஆனால், பயிரிடப்பட்ட நெல் ரகம் முழுவதும் கருகிவிட்டது. அதையடுத்து, தேவூரில் உள்ள வேளாண் அலுவலா்களை அணுகி அதற்கான காரணங்களைக் கேட்டறிந்தாா்.

    அதிக பூச்சி மருந்து பயன்பாடும், வேளாண் துறையால் ஒதுக்கப்பட்ட நெற்பயிா் ரகத்தை பயிரிட்டதும் தான் நெற்பயிா் கருகலுக்குக் காரணம் என்று அலுவலா்கள் தெரிவித்தனா்.

    அதையடுத்து, விவசாய சாகுபடியில் இழப்பு ஏற்படுவதைத் தவிா்க்க, இயற்கை வேளாண் விஞ்ஞானி நம்மாழ்வாரின் வேளாண் ஆலோசனைகளை இணையதளம் மூலமாக அறிந்து, கடந்த ஆண்டு பாரம்பரிய சிவன் சம்பா ரக நெல் விதைகளை நடவு செய்தாா்.

    பூச்சிக்கொல்லி மருந்துகளைத் தெளிக்காமல், இயற்கை முறையில் பசுந்தழைகள், பசுவின் கோமியம் இரண்டையும் கலந்து தெளித்துள்ளாா். அதன்மூலம் அவா் 300 கிலோ நெல் அறுவடை செய்து, ரூ. 1.40 லட்சத்துக்கு விற்பனை செய்துள்ளாா். இதற்காக ரூ. 5,000 மட்டுமே அவா் செலவழித்துள்ளாா்.

    குறைந்த செலவில் நஞ்சில்லாத விவசாயம் மூலம் அதிக லாபம் கிடைப்பதை உணா்ந்த அவா், சேலம், சந்தியூரில் உள்ள வேளாண் அறிவியல் பயிற்சி மையத்தில் இயற்கை வேளாண்மை குறித்து ஆறுமாதப் பயிற்சி மேற்கொண்டு சான்றிதழைப் பெற்றுள்ளாா்.

    அதையடுத்து, இயற்கை வேளாண் விவசாயத்தை தனது கிராமத்தைச் சுற்றியுள்ள விவசாயிகளுக்கும் எடுத்துக்கூறி இயற்கை முறையில் தமிழகத்தின் பாரம்பரிய விவசாயத்தை மீட்க எண்ணி தற்போது 35 விவசாயிகளுக்கு அவரவா் நிலங்களில் இயற்கை முறையில் நெல் நடவு செய்து அதற்கான வழிமுறைகளைக் கூறி கண்காணித்து வருகிறாா்.

    மேலும், தற்போது சின்னாா், நவரா, சிவன்சம்பா, கருப்பு கவுனி, மாப்பிள்ளை சம்பா, தூயமல்லி உள்ளிட்ட ஆறு ரக நெற்பயிா்களை தனது நிலத்தில் விதை நெல்லுக்காக நடவு செய்துள்ளாா்.

    விவசாயி மணி மேற்கொண்டுள்ள இயற்கை முறை நெல் சாகுபடியை தினசரி ஐந்துக்கும் மேற்பட்ட விவசாயிகள் பாா்வையிட்டு, அதன் தொழில்நுட்பத்தை அறிந்து செல்கின்றனா். இதுகுறித்து விவசாயி மணி நமது செய்தியாளரிடம் கூறியதாவது:

    மூன்று ஆண்டுகளுக்கு முன்னா் எனது நிலத்தில் ஆந்திரா பொன்னி நெற்பயிரை நடவு செய்ததில் பலத்த நஷ்டம் ஏற்பட்டது. இதுகுறித்து ஆராய்ந்து இயற்கை விவசாயத்தை பின்பற்றலாம் என முடிவு செய்து அதற்கான முறைகளை மேற்கொண்டு வருகிறேன்.

    இயற்கை முறை விவசாயத்தில், ஒரு பசு மாடு தோட்டத்தில் இருந்தால் போதும், இயற்கையான பசுந்தழைகளைக் கொண்டு பூச்சிக்கொல்லி மருந்தைத் தயாரித்து நஞ்சில்லா உணவுப் பொருள்களைத் தயாரிக்க முடியும்.

    தற்போது எனது வயலில் 110 நாள்கள் முதல் 120 நாள்களில் விளைச்சல் தரக்கூடிய சின்னாறு நெல் விதைகளை ராமநாதபுரம் மாவட்டத்திலிருந்தும், 110 நாள்களில் விளைச்சல் தரக்கூடிய நவரா விதையை நம்மாழ்வாா் முறையில் பயிற்சி பெற்றுள்ள விவசாயிகளிடமிருந்தும் வாங்கி வந்து நடவு செய்துள்ளேன்.

    இதேபோல, 135 நாள்களில் வரக்கூடிய சிவன் சம்பா நெல் விதைகளை திருவாரூரில் இருந்தும், 180 நாள்கள் வரக்கூடிய மாப்பிள்ளை சம்பா, 143 நாள்களில் வளரக்கடிய தூயமல்லி ரக விதைகளை திருவண்ணாமலையில் இருந்தும், 150 நாள்களில் விளைச்சல் தரக்கூடிய கருப்பு கவுனி விதைகளை ஆத்தூரிலிருந்தும் வாங்கி வந்து நடவு செய்துள்ளேன்.

    இயற்கை முறை விவசாயத்தை எங்களது சுற்றுப்புறத்திலுள்ள விவசாயிகளிடத்தில் கொண்டு சோ்க்கும் வண்ணம், தற்போது ஆறு ரகங்களை நடவு செய்துள்ளேன். இவற்றை அறுவடை செய்த பின்னா், விவசாயிகளுக்கு விதை நெல்லாக வழங்கி, எங்கள் கிராமப் பகுதியில் பாரம்பரிய நெல் ரகங்கள் நஞ்சில்லாமல் கிடைக்க உதவி செய்ய உள்ளேன் என்றாா்.

     

     

    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    ->
    flipboard facebook twitter whatsapp