ஆத்தூா்: ஆத்தூா் பேருந்து நிலையத்தில் தலைமைக் காவலரை தாக்கிவிட்டு கைதி தப்பியோடினாா். இதில், காவலருக்கு கை முறிவு ஏற்பட்டுள்ளது.
கள்ளக்குறிச்சி மாவட்டம், சின்ன சேலம் பகுதியில் திருட்டு வழக்கில் தேடப்பட்டு வந்த சக்ரவா்த்தி (23), சௌந்தர்ராஜன் (25) ஆகியோா் வேறு வழக்கில் ராசிபுரம் போலீஸாா் கைது செய்து நீதிமன்றத்தில் ஆஜா்படுத்தி சிறையில் அடைத்திருந்தனா்.
இந்நிலையில், திருட்டு வழக்கில் தேடப்பட்டு வந்த குற்றவாளிகளை சின்ன சேலம் சிறப்பு காவல் உதவி ஆய்வாளா் சுப்பிரமணி, தலைமைக் காவலா்கள் சிவராமன், முகமது முஸ்தபா ஆகியோா் ராசிபுரம் சென்று சக்ரவா்த்தி, சௌந்தர்ராஜன் ஆகியோரை கள்ளக்குறிச்சி நீதிமன்றத்தில் ஆஜா்படுத்த பேருந்தில் அழைத்து வந்தனா்.
ஆத்தூா் பேருந்து நிலையத்தில் இறங்கி கள்ளக்குறிச்சி பேருந்தில் ஏற காத்திருந்த போது, சக்ரவா்த்தி இயற்கை உபாதை கழிக்க கேட்டுள்ளாா். அவரை தலைமைக் காவலா் முகமது முஸ்தபா அழைத்துச் சென்ற போது, சக்ரவா்த்தி தலைமைக் காவலரை தாக்கி கீழே தள்ளிவிட்டு தப்பியோடினாா். கிழே விழுந்ததில், காவலரின் வலது கை முறிந்து ஆத்தூா் அரசு மருத்துவமனையில் அனுமதிக்கப்பட்டாா்.
இதையடுத்து, சௌந்தர்ராஜனை சுப்ரமணி, சிவராமன் ஆகியோா் சின்ன சேலம் அழைத்துச் சென்றனா். தகவல் அறிந்த ஆத்தூா் காவல் ஆய்வாளா் எஸ்.உமாசங்கா் வழக்குப் பதிவு செய்து சக்ரவா்த்தியை தேடி வருகிறாா்.