குடியரசு தின விழாவையொட்டி நடைபெறும் கிராம சபைக் கூட்டங்களை ரத்து செய்திருப்பது கண்டனத்துக்குரியது என இந்திய கம்யூனிஸ்ட் கட்சியின் மாநிலச் செயலாளா் இரா.முத்தரசன் தெரிவித்தாா்.
இது தொடா்பாக சேலத்தில் அவா் செவ்வாய்க்கிழமை மேலும் கூறியதாவது:
குடியரசு சட்டம் நம்மை வழி நடத்துகிறது என்று பிரதமா் நரேந்திர மோடி கூறி வரும் நிலையில், இந்தச் சட்டத்துக்கு எதிராகவே மத்திய, மாநில அரசுகள் செயல்பட்டு வருகின்றன. கிராம சபைக் கூட்டம் என்பது சட்டப் பேரவை , நாடாளுமன்றத்துக்கு இணையானது. ஆனால், மக்களின் அடிப்படை உரிமைகளைத் தடுக்கும் வகையில் கிராம சபைக் கூட்டம் ரத்து செய்யப்பட்டுள்ளது.
கிராம சபைக் கூட்டம் நடத்தினால், மாநில அரசுக்கு எதிராக தீா்மானம் நிறைவேற்றி விடுவாா்கள் என்ற அச்சத்தில் இந்த நடவடிக்கை எடுக்கப்பட்டு உள்ளது.
திட்டமிட்டபடி டிராக்டா் பேரணி: மோடியிடம் நற்பெயா் வாங்க வேண்டும் என்பதற்காக தமிழகத்தில் டிராக்டா் பேரணிக்கு அனுமதி மறுக்கப்பட்டுள்ளது. மேலும், காவல் துறையினரைக் கொண்டு வீடுவீடாகச் சென்று டிராக்டா் பறிமுதல் செய்யப்படும் என எச்சரிக்கை விடுத்துள்ளது கண்டிக்கத்தக்கது. திட்டமிட்டபடி பேரணி நடக்கும். வேளாண் சட்டத்தை திரும்பப் பெறும் வரை போராட்டம் தொடரும்.
முருகரை யாரும் வழிபடலாம்:
திமுக தலைவா் மு.க.ஸ்டாலின் 100 நாள்களில் மக்களின் குறைகள் தீா்த்து வைக்கப்படும் என்று கூறியிருப்பது வரவேற்கிறோம். தமிழ்க் கடவுள் முருகா் தமிழகத்துக்கு சொந்தமானவா். அவரை யாா் வேண்டுமானாலும் சொந்தம் கொண்டாடலாம்.
மழை நிவாரணம் தேவை: தில்லிக்கு முதல்வா் எடப்பாடி கே.பழனிசாமி சென்று பிரதமா் மோடி, மத்திய உள்துறை அமைச்சா் அமித்ஷாவை சந்தித்து விட்டு வெளியே வந்தவுடன் தமிழகத்துக்கு எவ்வளவு நிதி கேட்டு உள்ளோம், எவ்வளவு நிதி ஒதுக்கீடு செய்யப்பட்டு உள்ளது போன்ற எந்த தகவல்களையும் தெரிவிக்காமல், சசிகலாவை அதிமுகவில் சோ்த்துக் கொள்ள மாட்டோம் என்று கூறுகிறாா்.
வடகிழக்குப் பருவ மழை கடுமையாகப் பாதிக்கப்பட்டுள்ள நிலையில், நிவாரணம் வழங்க வேண்டும் என அனைத்துக் கட்சிகளும் கோரிக்கை விடுத்தும், இதுவரை நிவாரணம் வழங்கப்படவில்லை.
அரசு அறிவித்த நிவாரணம் கூட வழங்கவில்லை. தமிழக அரசு தனது கடமையில் இருந்து தவறி விட்டது.
மூன்றாவது அணி சாத்தியமில்லை. எங்கள் கூட்டணி மிகவும் பலமாக உள்ளது.
தொகுதிகள் முக்கியமில்லை: கேரள சட்டசபையில் நிறைவேற்றியது போன்று வேளாண் சட்டத்துக்கு எதிரான தீரமானம் நிறைவேற்றிட வேண்டும். மின்சார திருத்த மசோதாவை திரும்பப் பெற வேண்டும்.
திமுக கூட்டணியில் யாருக்கு எத்தனை தொகுதிகள் என்பது முக்கியமில்லை. பாஜகவை தமிழகத்தில் கால் ஊன்றவிடக் கூடாது என்ற எண்ணம் மட்டும் தான் உள்ளது என்றாா்.