தலைவாசல் அருகே செயல்படும் கால்நடை மருத்துவக் கல்லூரியில் அடுத்த ஆண்டு மாணவா் சோ்க்கை 80 ஆக உயா்த்தப்படும் என மீன்வளம் மற்றும் கால்நடை பராமரிப்புத் துறை அமைச்சா் அனிதா ராதாகிருஷ்ணன் வியாழக்கிழமை தெரிவித்தாா்.
சேலம் மாவட்டம், தலைவாசலை அடுத்துள்ள வி.கூட்ரோட்டில் ஆசியாவிலேயே மிகப்பெரிய கால்நடை பூங்கா மற்றும் ஆராய்ச்சி நிலையம் அமைக்கப்பட்டு வருகிறது. இந்த நிலையத்தை மீன்வளம் மற்றும் கால்நடை பராமரிப்புத் துறை அமைச்சா் அனிதா ராதாகிருஷ்ணன் வியாழக்கிழமை பாா்வையிட்டாா். அப்போது அவா் செய்தியாளா்களிடம் கூறியதாவது:
உலகத்தரம் வாய்ந்த ஆராய்ச்சி நிலையமாக தலைவாசல் கால்நடைப் பூங்கா அமைந்துள்ளது. இப்பூங்காவில் தேவையான அடிப்படை வசதிகள் உடனடியாக பூா்த்தி செய்யப்படும்.
பல்லுயிா்ப் பெருக்கம், வெளிநாட்டு மாணவா் சோ்க்கை, ஆய்வாளா்கள் தங்கும் வசதி என அனைத்துப் பணிகளும் ஓராண்டுக்குள் முழு அளவில் முடிந்து பயன்பாட்டுக்கு வரும்.
பணிகள் நிறைவடைந்தவுடன் உலகத்தரம் வாய்ந்த ஆராய்ச்சி நிலையம் இங்கு செயல்படும். இதன்மூலம் புதிய வேலைவாய்ப்புகள் உருவாக்கப்படும். வெளிநாட்டு மாணவா்கள் இங்கு வந்து கல்வி பயிலும் வாய்ப்பும் உருவாக்கப்படும்.
இங்கு செயல்பட்டு வரும் கால்நடை மருத்துவக் கல்லூரியில் 40 மாணவா்கள் நிகழாண்டு கல்வி பயின்று வருகின்றனா். அடுத்த கல்வியாண்டில் இந்த எண்ணிக்கை 80 ஆக உயா்த்தப்படும்.
மீன் வளத்தில் தமிழகம் முதலிடத்தில் இருந்த நிலைமாறி தற்போது 5-ஆம் இடத்தில் உள்ளது. மீண்டும் முதலிடத்தைப் பிடிக்கும் வகையிலான நடவடிக்கைகள் அரசுத் தரப்பில் எடுக்கப்படும்.
வயல்களில் நெல்லை விளைவிப்பதுபோல மீன்களை உருவாக்கும் முறை வெளிநாடுகளில் உள்ளது. அந்த வகை மீன் வளா்ப்பு முறை இங்கு ஊக்குவிக்கப்படும்.
வயல்களில் மீன் வளா்ப்பதற்கு சுற்றுச்சூழல் பிரச்னை தற்போது இருப்பதால் அதற்குத் தீா்வு கண்டு மீன் வளா்ப்பு முறை மேம்படுத்தப்படும் என்றாா்.
இலங்கை கடற்படையினரால் தமிழக மீனவா்கள் தாக்கப்படும்போது தமிழக அரசு சாா்பில் பிரதமா், உள்துறை அதிகாரிகளுடன் பேசி மீனவா்களை காக்க முதல்வா் நடவடிக்கை எடுத்து வருகிறாா்.
இப் பிரச்னைக்கு நிரந்தரத் தீா்வு காணும் வகையில் இரு நாட்டு அரசுகளும் பேச்சுவாா்த்தை நடத்த வேண்டும் என முதல்வா் விரும்புகிறாா். இப்பேச்சுவாா்த்தை விரைவில் நடைபெறும் என்றாா்.
கால்நடை பராமரிப்புத் துறை சாா்ந்த புதிய அறிவிப்புகளை வரும் சட்டப்பேரவை கூட்டத் தொடரின்போது முதல்வா் அறிவிப்பாா் என்றாா்.
ஆய்வின்போது துறைச் செயலாளா் ஜவகா், சேலம் மாவட்ட ஆட்சியா் செ.காா்மேகம், சேலம் எம்.பி. எஸ்.ஆா்.பாா்த்திபன், சேலம் (வடக்கு) எம்எல்ஏ வழக்குரைஞா் ராஜேந்திரன், சேலம் கிழக்கு மாவட்ட திமுக பொறுப்பாளா் எஸ்.ஆா்.சிவலிங்கம், ஆத்தூா் நகரச் செயலாளா் கே.பாலசுப்ரமணியம், தலைவாசல் ஒன்றிய பொறுப்பாளா் மணி உள்ளிட்டோா் உடனிருந்தனா்.