மேட்டூா் அணை திறப்பு நிகழ்வில் பங்கேற்பதற்காக, தமிழக முதல்வா் மு.க.ஸ்டாலின் வெள்ளிக்கிழமை மாலை சேலம் வருகிறாா்.
காவிரி டெல்டா பாசனத்துக்காக மேட்டூா் அணையில் இருந்து தண்ணீா் திறந்து விடப்படுவதையொட்டி, சென்னையில் இருந்து திருச்சி வரும் தமிழக முதல்வா் மு.க.ஸ்டாலின், கல்லணையில் வெள்ளிக்கிழமை ஆய்வு செய்து அங்கு தூா்வாரும் பணிகளைப் பாா்வையிடுவாா் எனத் தெரிகிறது.
பின்னா், அங்கிருந்து தனி விமானம் மூலம் மாலை 5.45 மணிக்கு சேலம், ஓமலூா் காமலாபுரம் விமான நிலையத்துக்கு வந்து சேருகிறாா். அங்கு அவரை அமைச்சா்கள், ஆட்சியா் உள்ளிட்டோா் வரவேற்கின்றனா். பின்னா் அஸ்தம்பட்டியில் உள்ள ஆய்வு மாளிகையில் இரவு தங்குகிறாா்.
சனிக்கிழமை காலை அங்கிருந்து புறப்படும் முதல்வா் மு.க.ஸ்டாலின், மேட்டூா் அணை பகுதிக்கு வந்து சேருகிறாா். மேட்டூா் அணையில் ஆய்வு மேற்கொள்ளும் அவா், காலை 10.30 மணி அளவில் மேட்டூா் அணையில் இருந்து காவிரி பாசனத்துக்காக தண்ணீரைத் திறந்து விடுகிறாா்.
நிகழ்ச்சியை முடித்துவிட்டு சேலம், ஓமலூா், காமலாபுரம் விமான நிலையம் செல்லும் முதல்வா், அங்கிருந்து தனி விமானம் மூலம் நண்பகல் 12 மணிக்கு சென்னை புறப்பட்டுச் செல்வாா் என அரசு வட்டாரங்கள் தெரிவித்தன.