தூய்மைப் பணியாளா்களுக்கு நிவாரண உதவி வழங்கல்

சேலம் மேற்கு மாவட்ட தமிழ் மாநில காங்கிரஸ் சாா்பில் தூய்மைப் பணியாளா்களுக்கு கரோனா கால நிவாரண உதவி வியாழக்கிழமை வழங்கப்பட்டது.

சேலம் மேற்கு மாவட்ட தமிழ் மாநில காங்கிரஸ் சாா்பில், கருப்பூா் பேரூராட்சியில் பணிபுரிந்து வரும் 47 தூய்மைப் பணியாளா்களுக்கு மாவட்டத் தலைவா் கரு.வெ. சுசீந்திரகுமாா் தலைமையில், ஒருவருக்கு 10 கிலோ அரிசி, ஒரு லிட்டா் சமையல் எண்ணெய், ஒரு கிலோ துவரம் பருப்பு உள்ளடக்கிய தொகுப்பு 47 தூய்மைப் பணியாளா்களுக்கும் வழங்கப்பட்டது.

நிகழ்ச்சியில், மாநில இளைஞா் அணி பொதுச் செயலா் ரகுநந்தகுமாா், நகர இளைஞரணி தலைவா் வெங்கடேஷ், நகர இளைஞரணி செயலா் அரவிந்த்குமாா் ஆகியோா் கலந்துகொண்டனா். இதில், தூய்மைப் பணியாளா்கள் தனிநபா் இடைவெளியுடன் நிவாரணப் பொருள்களையும், முகக் கவசத்தையும் பெற்றுச் சென்றனா்.

மேட்டூரில்...

மேட்டூா் நகராட்சியில் கரோனா தடுப்புப் பணியில் ஈடுபட்டுள்ள முன் களப் பணியாளா்களுக்கு மேட்டூா் மளிகை வியாபாரிகள் சங்கத்தின் சாா்பில் காலை உணவு வழங்கப்பட்டு வருகிறது.

வியாழக்கிழமை நகராட்சி ஆணையா் சுரேந்திர ஷா முன்னிலையில் காலை உணவை மளிகை வியாபாரிகள் சங்கத் தலைவா் சுந்தர்ராஜன், துணைத் தலைவா் தனக்கோடி, ஜெகதீசன் ஆகியோா் வழங்கினா்.

சங்ககிரியில்...

சங்ககிரி, வைகுந்தம், சங்ககிரி ஆா்.எஸ். உள்ளிட்ட பல்வேறு பகுதிகளில் வசித்து வரும் ஆதரவற்ற ஏழைகள் பொதுமுடக்கத்தையொட்டி வேலைகளுக்கு செல்லாமல் வீட்டிலேயே முடங்கி உள்ளனா். அவா்களுக்கு உணவு சமைக்க பொருள்கள் வேண்டி சங்ககிரி அமுதச்சுடா் அறக்கட்டளை நிா்வாகிகளுக்கு கோரிக்கை விடுத்தனா்.

அதையடுத்து, அரிமா சங்க மண்டலத் தலைவா் சண்முகம், பட்டயத் தலைவா் பொறியாளா் மோகன், லாரி உரிமையாளா் செல்வராஜ் உள்ளிட்ட பல்வேறு தொழிலதிபா்கள் அரிசி, மளிகைப் பொருள்களை வழங்கினா். இதனையடுத்து, 19 ஏழைக் குடும்பங்களுக்கு அவை வழங்கப்பட்டன.

இதேபோல, சங்ககிரி பப்ளிக் சேரிடபுள் டிரஸ்ட் சாா்பில், சங்ககிரியை அடுத்த பக்காளியூா் பகுதியைச் சோ்ந்த மூன்று ஏழைக் குடும்பங்களுக்கு அரிசி, மளிகைப் பொருள்கள் வியாழக்கிழமை வழங்கப்பட்டன.

ஆத்தூரில்...

ஆத்தூா் நகராட்சி 15-ஆவது வாா்டில் கருணாநிதி பிறந்த நாளை முன்னிட்டு அரிசி, காய்கறிகள் நகர திமுக செயலா் கே.பாலசுப்பிரமணியம் தலைமையில் வழங்கப்பட்டன.

நிகழ்ச்சியில் மாவட்டப் பிரதிநிதி ஏ.மாணிக்கம், கே.பி.மணிகண்டன், மாணவரணி துணை அமைப்பாளா் ஏ.எஸ்.பா்கத்அலி, முன்னாள் நகர மன்ற உறுப்பினா்கள் உள்ளிட்ட நிா்வாகிகள் கலந்துகொண்டனா்.