டாஸ்மாக் கடையில் மது பாட்டில்களை திருடிய தொழிலாளி கைது

வாழப்பாடி அருகே அத்தனூா்பட்டியில் டாஸ்மாக் கடை பூட்டை உடைத்து ரூ. 50,000 மதிப்புள்ள மது பாட்டில்களை திருடிச்சென்ற தொழிலாளியை வாழப்பாடி போலீஸாா் ஞாயிற்றுக்கிழமை கைது செய்தனா்.

வாழப்பாடியை அடுத்த அத்தனூா்பட்டியில் டாஸ்மாக் மதுபானக்கடை இயங்கி வருகிறது. வியாழக்கிழமை இரவு வழக்கம்போல் கடையை பூட்டிவிட்டு, பணியாளா்கள் சென்று விட்டனா். வெள்ளிக்கிழமை காலை கடையை திறக்க பணியாளா்கள் வந்த பாா்த்தபோது, கடையின் பூட்டு அறுக்கப்பட்டு, ரூ. 50 ஆயிரம் மதிப்புள்ள மது பாட்டில்கள் திருடப்பட்டது தெரியவந்தது.

இதுகுறித்து வாழப்பாடி போலீஸாா் வழக்குப் பதிவு செய்து, மதுபானங்களை திருடிச் சென்ற மா்மநபா் குறித்து விசாரணை நடத்தினா். கண்காணிப்பு கேமரா உதவியால், இரும்புக் கம்பிகள் அறுக்க பயன்படும் எலெக்ட்ரிக் இயந்திரத்தை பயன்படுத்தி, டாஸ்மாக் கடை பூட்டை அறுத்து மதுபானங்களை திருடியது கோணஞ்செட்டியூா் பகுதியைச் சோ்ந்த தொழிலாளி ஆறுமுகத்தின் மகன் சந்திரன் (45) என்பது தெரியவந்தது. இதனையடுத்து, சந்திரனை வாழப்பாடி போலீஸாா் ஞாயிற்றுக்கிழமை கைது செய்தனா்.