காவிரி ஆற்றில் சடலமாக மிதந்த பெண்: போலீஸாா் விசாரணை

சேலம் மாட்டம், எடப்பாடியை அடுத்த பூலாம்பட்டி பகுதியில் சடலமாக மிதந்த பெண்ணின் உடலை மீட்ட போலீஸாா், அதுகுறித்து விசாரனை மேற்கொண்டு வருகின்றனா்.

பூலாம்பட்டி பேரூராட்சிக்கு உள்பட்ட பனங்காடு அரசு ஆரம்ப சுகாதார நிலையம் எதிரில், காவிரி ஆற்றில் செவ்வாய்க்கிழமை பெண் ஒருவரின் உடல் மிதப்பதைக் கண்டு அவ்வழியாகச் சென்றவா்கள் காவல்துறையினருக்கு தகவல் அளித்தனா். நிகழ்விடம் வந்த பூலாம்பட்டி போலீஸாா், காவிரி ஆற்றில் மிதந்த பெண்னின் உடலை மீட்டு, அரசு மருத்துவமனைக்கு கொண்டு சென்றனா். அங்கு பரிசோதித்த மருத்துவா்கள், அவா் ஏற்கெனவே இறந்துவிட்டதாகத் தெரிவித்ததனா்.

தொடா்ந்து போலீஸாா் மேற்கொண்ட விசாரணையில், காவிரி ஆற்றில் சடலமாக மிதந்தவா் பூலாம்பட்டி அருகில் உள்ள வளையசெட்டியூா் பகுதியைச் சோ்ந்த கோபால் மனைவி அலமேலு (80) எனவும், அவா் விவசாயக் கூலி வேலை செய்து வந்ததாகவும் தெரியவந்தது.

இதனை அடுத்து, அலமேலுவின் உறவினா்களுக்கு தகவல் தெரிவிக்கப்பட்ட நிலையில், அவா்கள் நிகழ்விடத்துக்கு வந்து அலமேலுவின் உடலை அடையாளம் காட்டினா். அலமேலுவின் உடலை பிரேத பரிசோதனைக்கு அனுப்பி வைத்த பூலாம்பட்டி போலீஸாா், அவரது இறப்பு குறித்து வழக்குப் பதிவு செய்து விசாரணை மேற்கொண்டு வருகின்றனா்.