சேலம்: சேலம் அரசு மருத்துவமனையில் 1.75 கிலோ எடை கொண்ட குழந்தைக்கு பிறவி இருதயக் கோளாறு, அறுவை சிகிச்சை மூலம் சரி செய்யப்பட்டது.
கோவை மாவட்டம், பொள்ளாச்சி, நேரு நகா் பகுதியைச் சோ்ந்த பெண்ணுக்கு கடந்த ஜூலை 20-ஆம் தேதி அறுவை சிகிச்சை மூலம் 2.6 கிலோ எடை கொண்ட ஆண் குழந்தை பிறந்தது. இக்குழந்தை பிறந்தவுடன் அழாத நிலையில், செயற்கை சுவாசம் செலுத்தப்பட்டு பச்சிளம் குழந்தைகள் பிரிவில் தீவிர சிகிச்சை அளிக்கப்பட்டு வந்தது. பிறந்த 6-ஆம் நாளில் குழந்தையின் இருதய துடிப்பு வேகமாக இருந்ததால், இருதயத்தின் செயல்திறன் குறையத் தொடங்கியது. குழந்தையின் எடையும் 1.7 கிலோவாகக் குறைந்தது. நிலைத்த நாளத் தமனி ஏற்பட்டதால் குழந்தைக்கு அறுவை சிகிச்சை செய்ய முடிவு செய்யப்பட்டது.
இதன்பேரில், மயக்கவியல் துறை மருத்துவா்களின் பராமரிப்பில் கடந்த ஆக. 26-ஆம் தேதி எல்.டி.ஏ. லிகேசன் என்ற அறுவை சிகிச்சை செய்து, இருதயக் கோளாறு சரி செய்யப்பட்டது. பச்சிளம் குழந்தைகள் தீவிர சிகிச்சை பிரிவில் கண்காணிக்கப்பட்டு தற்போது குழந்தை தாயிடம் பால் குடித்து எடை கூடி வருகிறது.
இதனிடையே பிறவி இருதயக் கோளாறை வெற்றிகரமாக அறுவை சிகிச்சை செய்து குழந்தையைக் காப்பாற்றிய மருத்துவா்கள், பணியாளா்களை மருத்துவமனை முதன்மையா் மருத்துவா் வள்ளி சத்யமூா்த்தி பாராட்டினாா்.
இதுதொடா்பாக இருதய அறுவை சிகிச்சை மருத்துவா் பொன்.ராஜராஜன் கூறியதாவது:
பெருந்தமனிக்கும், நுரையீரல் தமனிக்கும் இடையே நாளத் தமனி என்ற இணைப்பு கருவில் இருக்கும். குழந்தை பிறந்த 1 முதல் 7 நாள்களில் இது தானாகவே மூடி விடும். சில குழந்தைகளுக்கு இது நிலைபெற்று நிலைத்த நாளத் தமனியாகி (எல்.டி.ஏ.) விடுகிறது. சேலம் அரசு மருத்துவக் கல்லூரி மருத்துவமனையில் இதுபோன்ற இருதயக் கோளாறு அறுவை சிகிச்சை செய்தது முதல் முறையாகும். தனியாா் மருத்துவமனைகளில் இந்த அறுவை சிகிச்சைக்கு ரூ. 5 லட்சம் வரை செலவாகும். அரசு மருத்துவமனையில் முற்றிலும் இலவசமாக செய்யப்பட்டது என்றாா்.