சீா்மிகு நகர திட்டப் பணிகளை விரைந்து முடிக்க வேண்டும் என ஆய்வுக் கூட்டத்தில் வலியுறுத்தப்பட்டது.
சேலம் மாநகராட்சி மைய அலுவலகத்தில் சனிக்கிழமை நடைபெற்ற ஆய்வுக் கூட்டத்துக்கு ஆணையா் தா.கிறிஸ்துராஜ் முன்னிலை வகித்தாா். இதில், சேலம் எம்.பி. எஸ்.ஆா்.பாா்த்திபன், எம்எல்ஏக்கள் ஆா்.ராஜேந்திரன் (சேலம் வடக்கு), இரா.அருள் (சேலம் மேற்கு), இ.பாலசுப்பிரமணியம் (சேலம் தெற்கு) உள்ளிட்டோா் கலந்துகொண்டனா்.
இதில், சீா்மிகு நகரத் திட்டத்தின் கீழ் 81 பணிகள் எடுக்கப்பட்டு இதுவரை 45 பணிகள் முடிக்கப்பட்டுள்ளன. மீதமுள்ள 36 பணிகள் செயல்பாட்டில் உள்ளன. குறிப்பாக, புதிய பேருந்து நிலையம் அருகில் அடுக்குமாடி வாகன நிறுத்துமிடம், தம்மண்ணன் சாலை, சத்திரம் சாலை, ஆனந்தா பாலம் அருகில் அடுக்குமாடி வாகனம் நிறுத்துமிடம், பெரியாா் பேரங்காடி அபிவிருத்தி பணிகள், பள்ளப்பட்டி ஏரிகள் அபிவிருத்தி செய்து அழகுபடுத்தும் பணி, மாா்க்கெட் மேம்பாடு, எருமாபாளையம் பசுமைவெளி பூங்கா பணிகள், சாலைகள் சீரமைக்கும் பணி, ஓடைகள் பலப்படுத்தும் பணி, குமரகிரி ஏரி புனரமைத்தல், பள்ளப்பட்டி ஏரிகள் புனரமைத்தல், நிலுவையில் உள்ள புதைச் சாக்கடை திட்டப் பணிகள் ஆகியவை நடைபெற்று வருகின்றன.
இப்பணிகளை குறிப்பிட்ட காலத்துக்குள் முடித்து பொதுமக்கள் பயன்பாட்டுக்கு கொண்டுவர வேண்டும் எனவும், சீா்மிகு திட்டப் பணிகளை விரைந்து முடித்து மாநகராட்சிப் பகுதிகள் அழகுற திகழ்ந்திட உரிய நடவடிக்கை மேற்கொள்ள வேண்டும் எனவும் அறிவுறுத்தப்பட்டது.
மேலும், கரோனா காலத்தில் சேலம் மாநகராட்சியில் பணியாற்றிய அனைத்து அலுவலா்களும் அா்ப்பணிப்பு உணா்வோடு பணியாற்றி கரோனா தொற்றினை குறைக்க நடவடிக்கை மேற்கொண்டதற்காக அனைத்து நிலை அலுவலா்களுக்கும் கூட்டத்தில் பாராட்டு தெரிவிக்கப்பட்டது.
இக்கூட்டத்தில் மாநகரப் பொறியாளா் அ.அசோகன், மாநகர நல அலுவலா் மருத்துவா் என்.யோகானந்த், செயற்பொறியாளா்கள், உதவி செயற்பொறியாளா்கள், உதவி ஆணையா்கள், சுகாதார அலுவலா்கள், வருவாய் துறை அலுவலா்கள் உள்ளிட்ட அனைத்து நிலை அலுவலா்கள் கலந்துகொண்டனா்.