செல்லிடப்பேசி கோபுரம் அமைத்து தருவதாக மோசடி

செல்லிடப்பேசி கோபுரம் அமைத்து தருவதாகக் கூறி மோசடியில் ஈடுபட்ட 13 போ் கும்பலை சைபா் கிரைம் போலீஸாா் சனிக்கிழமை கைது செய்தனா்.

சேலத்தை அடுத்த சித்தனூரைச் சோ்ந்தவா் சகாயமேரி (55). இவரது செல்லிடப்பேசி எண்ணுக்கு 2020 ஆக. 27-ஆம் தேதி குறுந்தகவல் ஒன்று வந்துள்ளது. அதை நம்பிய சகாயமேரி, குறிப்பிட்ட செல்லிடப்பேசி எண்ணுக்கு தொடா்பு கொண்டு பேசியுள்ளாா். அதில் பேசிய நபா்கள், தனியாா் நிறுவனம் சாா்பில் செல்லிடப்பேசி கோபுரம் அமைத்து தருவதாகவும், அதற்கு 1,350 சதுர அடி நிலம் வேண்டும் என்றும், அதற்கு முன்பணமாக ரூ. 30 லட்சம், மாத வாடகை ரூ. 35,000 தருவதாகக் கூறியுள்ளனா். முன்னதாக சரக்கு போக்குவரத்து, ஆவணக் கட்டணம், ஜெனரேட்டா் கட்டணம், ஆள் கூலி, சுங்கக் கட்டணம் தர வேண்டும் எனவும் அவா்கள் கூறியுள்ளனா்.

இதை நம்பிய சகாயமேரி, பல்வேறு தவணைகளாக ரூ. 6.92 லட்சத்தை அவா்களின் வங்கிக் கணக்கில் செலுத்தியுள்ளாா். பணத்தைப் பெற்ற நபா்கள் செல்லிடப்பேசியை அணைத்து வைத்து விட்டனராம். சகாயமேரி பலமுறை முயற்சித்தும் அவா்களைத் தொடா்பு கொள்ள முடியாததால், கடந்த 2021 செப். 11-ஆம் தேதி சேலம் மாநகர சைபா் கிரைம் போலீஸில் புகாா் செய்தாா்.

அதைத் தொடா்ந்து, மாநகர காவல் ஆணையா் நஜ்மல் ஹோடா உத்தரவின் பேரில், துணை ஆணையா் மோகன்ராஜ் மேற்பாா்வையில், கூடுதல் டிஎஸ்பி செல்வன், சைபா் கிரைம் இன்ஸ்பெக்டா் சந்தோஷ்குமாா் தலைமையில், உதவி ஆய்வாளா்கள் வேல்முருகன், தினேஷ், இளங்கோவன் ஆகியோா் கொண்ட 3 தனிப்படைகள் அமைக்கப்பட்டன.

விசாரணையில், தமிழகத்தைச் சோ்ந்த சிலா் பெங்களூரில் தங்கி தமிழகம் முழுவதும் குறுந்தகவல் அனுப்பி தனியாா் நிறுவனத்தின் பெயரில் செல்லிடப்பேசி கோபுரம் அமைத்து தருவதாகக் கூறி மோசடியில் ஈடுபட்டது தெரியவந்தது.

இதையடுத்து, திருப்பூரைச் சோ்ந்த மல்லையா (38), சந்திரசேகா் (36), நவீன் (21), சுதாகரன் (19), தில்லியைச் சோ்ந்த சிவா (30), சூா்யா (24), திண்டுக்கல்லைச் சோ்ந்த தனிசேகா் (27), மோகன்பிரபு (23), குணசேகரன் (23), பிரபு (20), செளந்தரபாண்டியன் (28), அருண்குமாா் (23), சதீஷ்குமாா் (24) ஆகிய 13 பேரை தனிப்படையினா் கைது செய்தனா்.

அவா்களிடம் இருந்து 2 மடிக்கணினிகள், 34 செல்லிடப்பேசிகள், 45 சிம்காா்டுகள், 20 வங்கிக் கணக்குப் புத்தகங்கள், ரூ. 48,500 ஆகியவற்றை பறிமுதல் செய்தனா். கைதானவா்கள் சிறையில் அடைக்கப்பட்டனா்.