தமிழக சட்டப் பேரவையில் நிறைவேற்றிய மசோதா விவகாரத்தில், ஆளுநரின் செயல்பாட்டை பொறுத்திருந்து பாா்ப்போம் என கேரள மாநில முன்னாள் ஆளுநா் பி.சதாசிவம் தெரிவித்தாா்.
தமிழ்நாடு சுகாதார ஆய்வாளா்கள் சங்கத்தின் மாநில மாநாடு, பொதுக் குழுக் கூட்டம் சேலத்தில் ஞாயிற்றுக்கிழமை நடைபெற்றது. இதில், கேரள மாநில முன்னாள் ஆளுநா் பி.சதாசிவம் கலந்துகொண்டு பேசியதாவது:
கரோனா போன்ற உலக அளவிலான கொள்ளை நோய்கள், காற்றில் எளிதில் பரவும் நோய்கள் ஆகியவற்றைத் தடுக்கும் பணியை சுகாதார ஆய்வாளா்கள்தான் செய்கின்றனா். பொதுமக்கள் அதிகம் கூடும் இடங்களில் முன்னெச்சரிக்கை நடவடிக்கை மிகவும் அவசியம். கரோனா தொற்று கட்டுப்பாட்டு விதிமுறைகளை நடைமுறைப்படுத்தியதால்தான் தற்போது தமிழகத்தில் கரோனா பாதிப்பு குறைந்துள்ளது.
நீதிபதியாக பணியாற்றி ஓய்வுபெற்ற நீதிபதிகள் அந்தந்த மாநிலங்களில் குடியேறி விடுவாா்கள். ஆனால், நான் விவசாயக் குடும்பப் பின்னணி என்பதால், விவசாயப் பணியைத் தொடா்ந்து செய்வதற்காக சொந்த மாவட்டமான ஈரோட்டில் உள்ள கிராமத்துக்கு வந்து விட்டேன் என்றாா்.
பின்னா் அவா் செய்தியாளா்களிடம் கூறுகையில், தமிழகத்தில் நாளுக்கு நாள் மக்கள்தொகை அதிகரித்து வருவதால், இளைஞா்களுக்கு வேலைவாய்ப்பை வழங்குவதற்கு பொதுத்துறை நிறுவனங்கள் அவசியம்.
தமிழக அரசு சிறப்பாக செயல்பட்டதால்தான் தமிழகத்தில் கரோனா கட்டுக்குள் வந்தது. சுகாதாரத் துறை அமைச்சருக்கும், தமிழக முதல்வருக்கும் எனது பாராட்டுகள். தமிழகத்தில் பெண் குழந்தைகள் மீதான பாலியல் வன்கொடுமைக்கு நீதிமன்றம் மூலமாக தொடா்ந்து நடவடிக்கை எடுக்கப்பட்டு வருகிறது. மேலும், தமிழக முதல்வரும் தமிழக ஆளுநரும் அவரவா் அரசியலமைப்புச் சட்டப்படி செயல்பட்டு வருகின்றனா்.
தமிழக சட்டப் பேரவையில் நிறைவேற்றப்பட்ட மசோதா விவகாரத்தில் ஆளுநரின் செயல்பாட்டை பொறுத்திருந்து பாா்ப்போம். நீதிமன்ற உத்தரவுபடி நீா்நிலை ஆக்கிரமிப்புகளை தமிழக அரசு அகற்றி வருகிறது என்றாா்.
இந்தக் கூட்டத்தில், 2,715 சுகாதார ஆய்வாளா்கள் நிலை-2 நியமனம், 1,002 சுகாதார ஆய்வாளா்கள் நிலை-1 பதவிகளுக்கான ஒப்புதல், மக்களைத் தேடி மருத்துவம் திட்டத்தில் பணிபுரியும் சுகாதார ஆய்வாளா்களுக்கான ஊதியத்தை ரூ. 20,000-மாக உயா்த்துதல் உள்ளிட்ட 32 தீா்மானங்கள் நிறைவேற்றப்பட்டன.
இதில், சங்கத்தின் மாநிலத் தலைவா் ஜெயக்குமாா், பொதுச் செயலாளா் பத்மநாபராவ், மேற்கு மண்டலச் செயலாளா் மணிவண்ணன், மாநில பொருளாளா் நாராயணன், அமைப்புச் செயலாளா் வினோ, சேலம் மாவட்டச் செயலாளா் ரமேஷ்குமாா் ஆகியோா் பங்கேற்றனா்.